Social media-a thu dik lo thehdarhtute Police hriat-tir thuai tura ngen an ni

Mizoram Police chuan thuchhuah siamin, social media-a thu dik lo vawrh darhtu hriate chu a rang lama Police hriattir turin an chah. Bank account kaihhnawihah inbumna a tam thu tarlangin, inbumna laka an fihlim theihna atan fimkhur turin mipui an ngen bawk.

Mizoram Police chuan, tunlaiin bank account/ passbook inlei­sak emaw, bank passbook leh ATM card-te rei lo tê atana inhmansak a, inbumna a tam thu sawiin, "Hetianga bank account leh passbook hawhsak a nih hian, bank account information zawng zawngte hriatsak vek an nih tawh ṭhin avangin a hnuah account inkhawih chingpensak zui a awm leh ṭhin," an ti.

Online hmanga thil chah emawin clearance fee, etc. chhuanlamin eng bank account number emaw advance-a deposit tura tiin mi tam tak buma an awm ṭhin thu sawiin Mizoram Police chuan, "Hetianga pawisa eng emaw zat deposit a nih hnu hian chin hriat lohin an tàwpsan leh ṭhin," an ti a; dâwta inbumna avangin mi tam takin pawisa an hloh phah tawh thu an tarlang.

Mizoram Police chuan, bank account mi dang leitir ṭhin pawh an awm thu sawiin, "Bank account an leite hi thil sual tihna atana hman a nih tlangpui avangin, a hnuah account leitirtute'n thubuai an awrh châng a tam a ni," an ti.

Police thuchhuah dang pakhat chuan, tun hnaiah state ṭhenkhatah mi tute'n emaw social media hmanga naupang kidnap chungchanga thu dik lo an vawrh darh avangin thih phah an awm hial thu a tarlang a; chu thil thleng chu Ministry of Home Affairs-in a ngai thutak hle tih sawiin, "Social media hmanga thu dik lo vawrh darh hi phal loh a ni a, state tin hotute hnenah thu dik lo theh darh leh vawrh darh ṭhinte chu chhui a, na taka hrem turin a ti a ni," a ti.

Police thuchhuah chuan, "Thu dik lo vawrh darh leh thehdarh ṭhin kan hria a nih chuan mipuite'n a rang thei ang bera police-te min hrilh ṭhin tur leh, hetiang kawngah hian theihtawp chhuah a police min ṭawiawm tur in kan insawm a ni," a ti a; social media-a thu dik lo theh darh a awm loh nan outreach programme leh awareness campaign nasa taka neih an tum thu a tarlang bawk.