Ramri endik thawh 2-na ṭan

Mizoram leh Assam ramri zir chiang tura Mizoram sorkarin a din, Core Committee hnuaia Task Team chuan nimin khan ramri endik hna thawh hnihna an ṭan.

Task Team-te hian ramri endik hna hi July 9, 2018-ah an thawk ṭan a, Kolasib leh Mamit district chhunga ramri endik hna chu July 13 khan an zo a ni. A thawh hnihnaah hian Aizawl district chhunga ramrite an enfiah dawn a, ruahman dan chuan vawiin hian an enfiah zo ang. Ruahman dan chuan, vawiin hian Ṭinghmun leh Kani vela ramri an enfiah ang.

Task Force-te hian ramri a hmuna an zir chian bakah, ramri hrûla chengte an kâwm a, ramri dinhmun an sawipui ṭhin. Tun thla chhunga an thil hmuh chhuahte Chief Minister hnena thehlut tura tih an ni.