Kawṭhalo do beihpui thlâkna hawng

Health minister Lal Thanzara chuan nimin khan Dawrpui School Conference Hall-ah kawṭhalo vanga naupang thihna ûm bona tura beihpui thlakna, Inten­sified Diarrhoea Control Forthnight (IDCF) 2018 a hawng. IDCF hi district dangah pawh a hawnna hun hman a ni a; kumina thupui chu 'Kawṭhalo vanga naupang thihna i ûm bo ang u’ tih a ni.

Minister Lal Thanzara chuan, National Health Mission (NHM) thil tum lian ber pakhat chu naupang thihna tihtlem a nih thu sawiin, "India rama kum tina nausên leh naupang nunna hlu tak suat ṭhintu 10% chu kawṭhalo a ni. Kawṭhalo hi natna tlangláwn leh huatthlala tak, hotêa lang, enkawl ṭhat loh chuan thihna thlen thei a ni," a ti.

Kawṭhalo chu nipui leh fûrah a hluar ṭhin tih sawiin Lal Thanzara chuan, "Hei vang hian sorkar laipui kaihhruaina hnuaiah Mizoramah pawh kum 2014 aṭang khan kawṭhalo dona atana hmalakna IDCF hi kan hmang tawh ṭhin," a ti a; IDCF chhungin ASHA-te'n an bial ṭheuhah in tinah kalin, naupang kum nga hnuai lamte hnenah ORS an sem daswn a, ORS siam dante an zirtir dawn tih a sawi.

Health Minister chuan, kawṭhalo enkawlna ṭha ber chu ORS leh Zinc a ni tih sawiin, "ORS leh Zinc ṭhatnate hi kan hmelhriat viau tawh chungin, National Family Health Survey (NFHS) 4-a a lan danin, naupang kawṭhalo zinga 69% chauhin ORS-a enkawlna an dawng a, 29% chauhin Zinc-a enkawlna an dawng a ni," a ti a; kawṭhalo laka inveng turin ei leh inah fimkhur a ngaih thu leh in leh a vêlte vawnfai a ngaih thu a sawi bawk.

IDCF hi kum 2014-ah hman ṭan niin, fûr ruahtui tam hma emaw, ruahtui tam lei emawa hman ṭhin a ni a; kuminah chuan July 16-28 chhungin hman a ni dawn. Fortnight chhungin naupang kawṭhalo enkawlna atana ṭha ORS leh Zinc ṭhatnate mipui zirtir a ni dawn a; sorkar damdawi-in, sub-centre leh anganwadi centre-ahte ORS-Zinc Corner siam a ni ang a, chu'ngahte chuan nau­pang kawṭhalote enkawl­na pek an ni ang.

IDCF hawnna in­khawm hi National Health Mission (NHM) mission director Dr Lalrozama'n a kaihruai a; Reproductive and Child Health (RCH) SPO Dr Hmingthanmawii'n kawṭhalo laka naupang ven dan leh a enkawl dante a sawi a ni.

IDCF hawnna in­khawm hi Lungleiah chuan Lunglei Venglai Middle School-ah neih a ni a, Lunglei chief medical officer Dr Thani Pachuau-in a hawng. Lunglei nursing superintendent Lalzami'n naupang leh zirtirtu kalkhawmte hnenah kut sil dan dik a zirtir a ni. Siahaah pawh IPR Conference Hall-ah IDCF hawnna inkhawm hman a ni bawk.