KHAWTHLIR

Rengdil lal a thi
Rengdil lal hnuhnung ber, Lalzamanga (92) chu nimin zing dar 4:30 khan Rengdila a inah a thi a, nimin vêk khan vui a ni. Thu dawn danin, Lalzamanga hi kum 1927-ah Rengdilah a piang a, Rengdil lal hmasa ber Darsata tupa a ni. March 29, 1946-ah Assam Regiment zawmin, sipaia kum nga a ṭan hnuah, kum 1951-ah a pa Rengdil lal Thankunga a thih avangin Calcutta (Kolkata)-a a awm lai Bawrhsapin lal ni turin a ko haw a, kum 1954-a lal bàn a nih thlengin Rengdilah a lal a ni.

Mizo Cardinal Choir lawmpui
Mizoram Youth Commission chairman Joseph Lalhimpuia, MLA chuan thuchhuah siamin, Mizo Cardinal Choir-te chu India aiawha khawvela zaipawl inelna sang ber, 10th. World Choir Games-a an tel leh, Championship Competition final round-ah silver medal an la phak chu thinlung takin a lawmpui thu a tarlang a; an kel zelna turah duhsakna a hlan.

Scholarship exam
July 14, 2018 khan Mizoram Youth Commission (MYC) chuan Mizorama a ṭum khatna atan Mizo HSS leh Lunglei HSS-ah IIT-JEE & NEE Online Coaching Scholarship Exam an buatsaih a, Aizawlah mi 764 leh Lungleiah mi 162-in exam an hmachhawn. He exam-a zirlai ti ṭha 300 chuan pawl 11 leh pawl 12 an zir chhung zawng a thlawnin coaching an kal thei dawn a ni.

Zu man zat
Excise & Narcotics department chuan June 2018 chhung khan zu zuar mi 88, zu rûi mi 17 an man. June thla vek khan rakzu litre 1,234.625, zu bilh lai ṭin 2,335, sap zu (ûm puitling) ûm 99 manin, zu kaihhnawihah lirthei pali an man bawk.