Khawpui fai inelna hawn a ni

UDPA minister Zodintluanga chuan nimin khan a pisaah 'Mizoram khawpui fai inelna 2018’ a hawng. Khawpui fai inelnaah hian Mizorama census town 23-te an tel dawn a ni.

Zodintluanga chuan, faina kawnga hmasawn turin sorkar leh mipuite'n thawhhona ṭha an neih a ngai tih sawiin, "Faina kawngah hmalakna thar a awm zel a, heng hi mipuiin an thlàwp ṭhat a pawimawh. Tun aṭanga rei lo têah bawlhhlawh ṭawih thei leh ṭawih thei lote a hrana paih dan tur mipui zirtir zel chungin tih ṭan a ni dawn," a ti.

Aizawl leh district khawpui dangahte bawlhhlawh paihna hmun (dumping ground) changtlung zawk leh ṭha zawka bawlhhlawh sâwngbâwl dan tur sorkarin a ngaihtuah mek thu sawiin Zodintluanga chuan, "Mipuite faina lama hrilhhriatna turin ṭhalaite an thawh chhuah zel a ngai," a ti a; Mizoram puma khawpui fai inelna turah endiktute'n an la endik dawn vanga hnatlang koh chawpa khawlai tifai ringawt lo a, ni tin mahni phâk tâwka faina kenkawh leh nunphunga neih a pawimawh thu a sawi.

UDPA secretary Dr C Vanlalramsanga chuan, September 2017 aṭanga September 2018 chhung chu 'Cleanliness Year' atan puang a nih thu sawiin, khawpui fai inelnaah September 1-20 chhungin endik hna thawh tum a nih thu a sawi. UDPA deputy director C Laltleipuii chuan, ‘Mizoram khawpui fai inelna' chungchang a sawifiah bawk.

Mizoram khawpui fai inelna chungchang hre chiang duh tan UDPA website www.udpamizoramnic.in ah enfiah theih a ni.

Inelna hawnna inkhawm­ah hian AMC commissioner Dr H Lalthlangliana, district pariata UDPA officer-te leh a kaihhnawih mi pawimawh dang­te pawh an tel a ni.