Nasa zawka PCPNDT Act inzirtir rél
Health minister Lal Thanzara hoin nimin khan CMO Conference Hall-ah State Supervisory Board Meeting of PCPNDT (Pre-Conception and Pre-Natal Diagnostic Techniques) Act an ṭhu a; PCPNDT Act hi kohhran hmeichhia leh MHIP-ah zirtirna nasa zawka kalpui an rel.
Minister Lal Thanzara chuan, PCPNDT Act chu Mizoramah hriat lâr ni lo mah se, sorkar laipuiin a ngai pawimawh hle tih sawiin, "Sorkar department leh pawl hrang hrang hnenah zirtirna kalpui zel a ni a. Nau piang hmeichhia duh lohna leh tihhlum ang hi Mizoramah hriat tur a awm lo a, India ram hmun dangah erawh a thleng nasa hle. he danin a phal leh phal loh hriat chian leh zual kawngah State Supervisory Board-in mawhphurhna sang tak a nei a ni," a ti.
Meeting-ah hian, PCPNDT Act chungchang mipuiin an hriat leh zual theih nan kohhran hmeichhia leh MHIP-ah zirtirna kalpuji an rel a; Mizorama ultrasound khawl hmangtute chu training pek tawh an nih leh nih loh enfiah kawngah hmalak belh zel an rel bawk.
Meeting-a tarlan danin, Mizoramah ultrasound khawl nei (centre) PCPNDT Act-a register 52 a awm a; Aizawl district-ah 27, Lunglei district-ah pasarih, Siaha district-ah pathum, Lawngtlai district-ah pali, Champhai district-ah paruk, Kolasib district-ah pahnih, Serchhip district-ah pahnih leh Mamit district-ah pakhat a awm.
Ultrasound operator (radiologist, gynaecologist, MBBS sonologist) Mizoramah mi 45 an awm a; PCPNDT Act-in a phal anga centre pahniha thawk kawp mi 21 leh centre pakhata thawk mi 24 an awm. April 2017 April aṭangin nimin thleng khan ultrasound centre 39 endik a ni tawh a, dan loa ultrasound khawl hman vanga hrem an la awm lo.
Kum 2011 chhiarpuia a lan danin, India rama sex ratio chu 919 (mipa 1,000-ah hmeichhia 919) a ni a; Mizorama sex ratio chu 970 (mipa 1,000-ah hmeichhia 970) niin, India ram puma sex ration aiin a sang zawk a ni.
Nimina State Supervisory Board Meeting of PCPNDT meeting-ah hian Health Secretary, State Supervisory Board member te, kohhran hmeichhe hruaitute leh MHIP hruaitute an tel.