Vai party kan ram aṭangin kan ûm bo ang - Zoramthanga

MNF president Zoramthanga chuan, Mizo nationalism leh Mizo culture chawisàna a awm hunah vai party chu Mizoram aṭangin an ûm bo dawn niin a sawi.

Nimina Mizo Hnam Rûna inkhawmah thu sawiin Zoramthanga chuan, "Kan ram aṭangin vai party ûm boin, corruption leh zu vanga thihnate hi kan ûm bo tawh ang. Kan ram malsawmna hai chhuakin MNF tan chauh ni lo, Mizo mipui tan chauh pawh ni lo, Lalpa tan rawng kan báwl dawn a ni," a ti.

Zoramthanga chuan, tunlaia Zoram thar aupuitute chu Pathianin au tura a tih anga au an nia sawiin, "Zoram thar lo thleng tur hi Lalpa'n a hrilh lâwk a ni. Keini chuan politics leh election hmangin kan bei a, duh thuhmun leh thil kalpui thuhmun kan ni a, kan goal chu a inang reng a ni," a ti a; Zoram thar aupuitute thinlungah Pathianin hnam thuthlung a pe niin a sawi.

NLUP thal alh thei hmangin Mizote kah thlukin an awm mek nia sawiin Zorama chuan, "Delhi buhfai ei ṭheuh ṭheuh, tiin vai pathian bán sawm nei hmaah an puja a, coconut an sawh keh a, kohhran ngainêpa zu zuar luiin mi tam takin nunna an chàn phah. Mizoramah MNF kan sorkar a, hnam thuthlung leh kan culture chawisana a awm hunah, malsawmna ruai, rethei ber hnena chawi hniama a awm hunah chuan mi tin sum lak luh nasa takin a pung tawh dawn a ni," a ti.

Nimina Mizo Hnam Runa inkhawmah hian mi langsar tak takte MNF party-ah Zoramthanga'n a lawm lut niin MNF thu­chhuah chuan a tarlang.