Hmar hmusittua puhte lakah FIR thehlut

Hmar Students' Association (HSA), Aizawl chuan July 15, Pathian­ni zan khan Bawngkawn Police Station-ah Hmar hnam hmusit leh deusawh zawnga social media-a post siamtua an puhte lakah FIR an thehlut.

HSA chuan thu­chhuah siamin, Maneiha Bochung, Mahmuna Chalthleng leh RL Chhanhima te lakah FIR an thehluh thu an tarlang a, "Whatsapp group hrang hrangah 'Hmar ho mi ina awm turin Aizawlah an rawn fuan ṭeuh mai a, thil rûk an hrât bakah, dâwt sawi an hrât khawp mai,' tiin Hmar hnam hmusit zawnga thu dik lo hi kan ngaithiam lo hle a ni," an ti.

Chi inthliarna leh Zo fate inpumkhatna tichhe thei zawnga thu thehdarhtute chu zawn chhuah an nih ngei theih nan leh an phu tâwk hremna pek an nih ngei theihna atan FIR chu thehlut an nih thu HSA chuan an tarlang.

Zo fate inpumkhatna turin MZP, MSU leh hnam pual zirlai pawl dangte nen theihtawp chhuaha hma an lak mek thu sawiin HSA chuan, "Hetianga hnam anga inhmusitna leh inthliar hranna hawi zawnga post lo awm ta hi mak kan tiin kan dem tak zet a ni," a ti a; tun hnuah thleng tawh lo se an duh thu an sawi bawk.