Mamit district-ah GSA-MI hawn a ni

India rama district hnufual, a bik taka dâwm kân ngai, Aspiration District-a puan zingah Mamit district a tel a; Aspirational district-te tana duan Gram Swaraj Abhiyan - Mission Indradhanush chu nimin khan Mamit DC Bhupesh Chaudhary-a'n Mamit District Hospital OPD building-ah a hawng.

Mamit Bawrhsap chuan, India ram chu khawvela ram lian leh mihring tamna a ni tih sawiin, mipuite tun aia an hrisel zel theihna turin naupan lai leh nuin a pai lai aṭanga natna chi hrang hrang laka invenna lak ṭhat a pawimawh thu a sawi a, "Nau piangte an hrisel chuan India ram pawhin nasa takin hma a sawn phah dawn a ni," a ti.

Bhupesh Chaudhary chuan, "Mamit mistrict hi kawng hrang hrangah kan hnufual a, hriselna kawngah pawh district dang aiin kan hnufual. Hei vang hian Aspirational District-a puan pawh kan ni," a ti a; Mamit district mipui an ṭan rual a, hriselna kawnga nasa taka ṭan an lak chuan district changkang ber an nih theih a beisei thu a sawi.

Gram Swaraj Abhiyan-Mission Indradhanush hi Aspiration District-te tana duan niin, naupang kum hnih hnuai lam leh nu nau pai mekte'n hri danna chi sarih an lakna tur programme a ni a; ni sarih chhung awh tur niin, ni sarih chhungin Mamit district-a khaw hrang hrang 18-ah nu nau pai mekte leh naupang kum hnih hnuai lamte hnenah hri danna (vaccine) pek a ni ang. A hawnna inkhawmah hian Mamit Bawrhsap chuan naupang ṭhenkhat hnenah vaccine a pe nghal a ni.