CCC/DCHC aṭanga chhuakte thlah

Covid-19 hripui vei, endik nawnnaa hripui vei tawh lo tih finfiah tawh zinga Lunglei district mi 45 leh Mamit district mi pariatte chu nimin khan an awmna Dedicated Covid Health Centre (DCHC) leh Covid Care Centre (CCC) aṭangin chhuahtir an ni a; an chhuah hmain thlahna hun hman a ni.

Lungleia mi 45-te thlahna inkhawm, CCC - Lunglei College-a neihah district bawrhsap V Lalsangliana chuan, hripui vei enkawltute - medical team, magistrate, security, cook leh mawhphurhna dang neite fakawm a tih thu a sawi a; Covid-19 vei dam tawhte chu mi dang tan hlauh leh ṭih tur an ni lo tih sawiin, thinhrik lo turin mipui a chah.

Lungleia Covid-19 vei dama chhuakte hi mipa 29 leh hmeichhia 16, kum 18-33 inkar an ni a; an zinga mi 44 chu CCC-a enkawl niin, pakhat chu DCHC - ETC SIRD, Pukpuiah a awm. Mi 23 chu Tlabung sub-division huam chhunga mi an ni a, MST bus hmangin hruai haw an ni.

Mamita CCC - SSA Girls Hostel-a enkawl dam tawh mi pariatte pawh thlahna inkhawm tawi hmanpui a ni a, mipa leh hmeichhia pali ve ve an ni. Hripui veite CCC-a enkawl tura inpe Dr Lalhriatpuii chuan, CCC-a hripui vei la awm mekte chu an dinhmun a ṭhat thu leh, nimina chhuahtir mi pariatte bak Covid-19 vei tawh lo tih finfiah tawh an awm nual thu a sawi bawk.

Mamit district-ah hian Covid-19 vei mi 20 hmuh chhuah an ni tawh a, nimina chhuahtir mi pariat bakah SRH-ZMC aṭangin mi pakhat a chhuak tawh. Rinhlelh thila dah hran mekte nen CCC-ah mi 13 leh DCHC-ah mi pakhat an awm mek a ni.