Serchhip Ṭhalai Pawl-in Doctor thar neih nghakhlel

Serchhip Ṭhalai Pawl (SṬP) chuan nimin khan thuchhuah siamin, Serchhip District Hospital (JN Hospital)-a thawk tura Serchhip khaw mi ngei Dr Lalruatliana Pachuau sawn a ni chu an lawm thu leh surgeon a nih avangin mipui mamawh tak a nih thu an tarlang a; sorkar chungah an lawmthu an sawi.

SṬP chuan, Serchhipah hun rei tak aṭangin surgeon an neih loh avangin harsatna tam tak an tâwk ṭhin tih sawiin, "Mi harsa leh rethei tak takte'n surgeon kan neih loh avangin harsa tak chunga hmunpui an pan a lo ngai ṭhin a, chu'ng harsatnate chu sorkarin surgeon min pek takah chuan a kiang ngeiin kan ring," an ti a; Dr Lalruatliana Pachuau chu Serchhip mipuite'n nghakhlel taka an thlir reng thu an tarlang.

Champhai District Hospital-a thawk lai Dr Lalruatliana Pachuau hi Serchhip District Hos­pital-a thawk turin June 24, 2020-ah transfer order a chhuak a; Champhaia thawk lai doctor dang pakhat pawh sawn chhuah a ni. Chutih rualin, anmahni thlaktu tur doctor pahnih Champhaia awm turin tih a ni bawk.

Hetih lai hian, Cham­phai MZP chuan, doctor chhuak tura tih pakhat zawk chu an ui beh ngam loh thu an sawi laiin, Dr Lalruatliana Pachuau chu chhuak lo se an duh a, transfer order sût turin Health Minister hnenah ngenna an thlen niin an tarlang.