Covid-19 vanga hna chân phahte Hna thawh theih dan tur ngaihtuah

Mizoram Youth Commission (MYC) kaihhruainain Mizoram páwna hnathawk, Covid-19 vanga an hnathawh chhunzawm thei lote'n hnathawh tur an neih theih dan tur ngaihtuah a ni.

June 29, Thawhṭanni khan MYC chairman Dr Vanlalṭanpuia hoin Labour, Employment, Skill Development & Entrepreneurship (LESDE) director K Lalhmingliana, Tourism director V Lalengmawia, Planning principal adviser Lalrikhuma Sailo, Disaster Management & Rehabilitation (DMR) director John LT Sanga-te leh UDPA leh Commerce & Industries department hotute MYC conference hall-ah an ṭhukhawm a; Covid-19 vanga hnathawh tur nei lote'n hnathawh tur an neih theih dan tur an sawiho.

Dr Vanlalṭanpuia chuan, Mizo ṭhalaite tam takin phai lama an hna an chawlhsan a ngai leh an rawn haw hnua hna an nei lo chu pawi a tih thu sawiin, "MYC chu ṭhalaite inpui a nih angin heng hna chán ta, ṭanpui ngaite tan hian a ding tlat dawn. Mizo ṭhalaite tan hna ṭha zawk leh chhenfâkawm zawk chhawp chhuak a, puih ngaite pui a, khawvel mithmuha Mizo ṭhalaite hlutna sang tak pho chhuah zel hi MYC thil tum a ni," a ti.

MYC Chairman chuan, Covid-19 vanga harsatna tâwkte leh Mizo ṭhalaite eizawnna hrang hranga training kaltlanga chhawp chhuahna Covid Plan duan a nih tawh thu a sawi. Meeting-ah hian Mizo ṭhalai, Covid-19 vanga Mizorama rawn haw, phai lama an hna chán tate ûm zui dan tur te, sum an thawh chhuah leh theih nana hmalak dan turte leh hna chánte tana financial institution leh skill training institute-te an luan chhuah theih dan turte sawiho a ni. Department hrang hrangin scheme an neihte leh an hmalak theih dan turte zir chiang a, a ṭul anga bawhzui turin MYC official-te ruat a ni.