Bru mipuiin Draft Agreement an duh lo ; Agreement aṭangin MBDPF inhnûkdâwk

Mizoram Bru, Tripura relief camp paruka awm mekte Mizorama hruai kîrna tura inremna (Draft Agreement) ziah chu relief camp-a awm mek Bru eng emaw zatin an duh lo a, July 16, Thawhṭanni khan an duh lohzia an lantir. Chumi kal zelah chuan Mizoram Bru Displaced People Forum (MBDPF) president A Sawibunga chu Thawhṭanni chawhnu khan Draft Agreement aṭangin a inhnûkdâwk.

Thu dawn danin, Ministry of Home Affairs, Mizoram sorkar, Tripura sorkar leh MBDPF-te'n relief camp-a awm Bru-te Mizorama hruai kîrna tura July 2, 2018-a New Delhi-ah inremna, Draft Agreement an ziaha lungawi loin Naisingpara, Hazacherra leh Asapara camp-a awmte chu July 16 chhun khan camp lian ber Naisingpara-ah an pungkhawm a, mi 3,000 vel an tling.

Bru mipui lungawi lote chuan Bru relief camp paruka Mizoram mi awmte September 30, 2018 ral hmaa Mizorama hruai kîr vekna tura inremna thuthlung an siam chu ṭha tawk loa ngaiin, sût a nih theih nana hma la turin MBDPF hruaitute an nawr a; lungawi lote chuan MBDPF pisa pawh an suasam a ni.

Mipuiin lungawi lohna an lantir avang hian Draft Agreement-a Bru aiawha hming ziaktu MBDPF president A Sawibunga chuan inremna thuthlunga a hming ziah chu a sût tih a puang a; lehkhaah a sûtna thu ziak nghalin, chu lehkha chu North Tripura District-a Kanchanpur Sub-Divisional Magistrate Sazal Biswas, SDPO Kiren Kumar leh deputy collector Anish Deb Burma ten an hriatpui a ni.

July 16-a thil thleng chungchang leh inremna thuthlung aṭanga MBDPF President a inhnuhdawh thu hi Ministry of Home Affairs-a adviser Mahesh Kumar Singla pawh hriattir nghal a ni.

Vanglaini palai zawhna chhangin MBDPF chairman A Sawibung chuan mipui nawrna a nasat avanga inremna aṭanga inhnukdawk hi a nih thu sawiin, "Mipui engemawzat an lungawi loa, chawte ngheiin kawngte an zawh a ni. Kan office aṭang pawha chhuak thei lotein min siam a, mipui lawmna atan leh boruak ṭha zawk a awm theihna atan ka inhnukdawk ta a ni," a ti.

A Sawibung chuan Draft Agreement chuan duhthusam lo mah se, inbiakna a awm leh hunah siamṭhat theih a nih tho thu mipuite an hrilh tih sawiin, "Mah se, mipui lamin an ring ngam lo a, an lungawi thei lo," a ti a, agreement aṭanga inhnukdawk tura an nawr tlat thu a sawi.

Hetihlai hian vawiin hian Agartala, Tripura-ah Bru lak let chungchangah hian MHA-a Special Secretary kaihhruaina hnuaiah Tripura, Mizoram leh MBDPF-te aiawhte meeting neih tura tih a ni a, mahse MHA lamin an ṭhulh.

Meeting-ah hian Mizoram aṭangin Home secretary Lalbiakzama, Home OSD David H Lalthang­liana, CYMA president Vanlalruata leh Bru Coordination Committee chairman Elvis Chorkhy-te chu tel tura tih an ni.

Kumin July thla tira Draft Agreement ziah a nih hnu lawkah Naisingpara Bru camp-a awm mek, Bisma Joy Malsoi (53), Saihapui, Kolasib district chuan inremna thuthlunga a lungawi lohna lantirin Naisingpara camp bula mandir-ah chaw a nghei ṭan a.

Thu dawn danin, Bisma Joy Malsoi hi July 16, Thawhṭanni khan lungawi lohna lantira pung khawmte chuan chaw a ngheina hmun aṭanga la chhuakin, MBDPF pisaah an zâwn lut a; a hnuah a chauh tawh avangin Kanchanpur aṭanga kal doctor-te'n enfiahin, damdawi-inah an hruai zui a ni.

MBDPF pisaah hian Bisma Joy Malsoi bakah, mi dang 15 velin Thawhṭanni aṭang khan chaw an nghei ṭan ve a ni.

Draft Agreement-a lungawi lote hian Mizorama an lêt huna an awmna tur hmun ruatah chhungkaw 500 vel a huhoa awm te, anmahni vengtu tur sipai (para military force) dah te, an eizawnna tur ram chhungkaw pakhat tan hectare 5 ṭheuh pek te, anmahni chhawmdawlna tura chhungkaw tin tan Rs. 4,00,000 pek tur chu kum thum hnua pek chhuah tura ti loin, bank-a pawisa dah luh dan pangngaia dah luhsak te, Bru culture leh sakhuate humhim a nih a, ei leh bara hma an sawn theih nan Development Council dinte an phût a ni.

Tarlan tawh angin, Draft Agreement-ah hian Tripura relief camp-a Bru awm mek, Mizoram mi chhungkaw 5,413-a mi 32,857-te Mizorama hruai kîrna turin New Delhi-ah Home minister Rajnath Singh, Mizoram chief minister Lal Thanhawla, Tripura chief minister Biplab Kumar Deb leh MBDPF president A Sawibunga te an inkâwm a; Draft Agreement siamin an pawm nghal a ni.

Draft Agreement-ah hian Ministry of Home Affiars aiawhin special secretary (Internal Security) Rina Mitra, Mizoram sorkar aiawhin Home secretary Lalnunmawia Chuaungo, Tripura sorkar aiawhin chief secretary Sanjeev Ranjan leh MBDPF aiawhin president A Sawibunga ten hming an ziak a ni.