Hmasawnna hnathawhah Mizoram sorkarin a tih tur a tichak tawk lo - Union Minister

Union minister for Statistics & Programme Implementation DV Sadananda Gowda chuan, sorkar laipui sum hmanga hmasawnna hna thawhah Mizoram sorkarin a tih tur a tichak tâwk ṭhin lo niin a sawi.

Zan khat riaka Mizo­ram rawn tlawhtu DV Sadananda Gowda hian Thawhṭanni zan khan Secretariat conference hall-ah thuthar thehdarh­tute a kâwm a; Mizoramah cheng vbc. 5613 man sorkar laipui sum hmanga thawh mek a nih thu sawiin, "Heng project pali thawhna atana a tìra ruahman chu cheng vbc. 1632 a ni a, tunah chuan cheng vbc. 5613 sen tura ruahman a ni tawh. A tira ruahman aiin senso tur hi cheng vbc. 3981 (243.84%)-in a tam a ni," a ti.

Union Minister chuan, sorkar laipui sum hmanga hmasawnna hna thawh pali zinga pathum - NH-44A km. 103-a thui double lane-a siam te, Bairabi-Sairang rel kawng siam mek leh, NH-54 double lane-a siamna tur project-te chu kum 2020-ah zawh hman a nih tur thu sawiin, "Chief Secretary hoin committee dina harsatna awmte chinfel a ni dawn," a ti a; Kaladan Multi Modal Transit Transport Project (KMMTTP) chu harsatna eng emaw avangin kum 2020-ah zawh hman a nih dawn loh thu a sawi.

Vanglaini palai zawhna chhang­in Sadananda Gowda chuan, Mizoramah ruah sûr chhung a rei avangin hna thawh hun a tlem thu a sawi a, "Chutih laiin, hma­sawnna hnathawhah hian ram lak chungchangah a kaihhnawih department-te an thawkho ṭha tawk loin ka hria. Hna thawhna kawnga harsatna a awm chuan state sorkarin a ngaihven ang a, rang takin sorkar laipuiah an thlen ṭhin tur a ni. Mizoram sorkar hian a tih tur an timuang deuh ṭhin," a ti.

Sadananda Gowda chuan, a hun taka sorkar laipui sum hmanga hmasawnna hna thawh zawh a pawimawh thu sawiin, "Hmasawnna hnathawh chak a nih hian state-te hmasawnna a nih piah lamah, mi tam takin hnathawh tur an neih phah a, sum lak luhna atan a pawimawh," a ti a; central sector hnuaia hmasawnna hnathawhte state hmasawnna tur a nih tih hria ṭha zawka ngaihven turin state sorkarte chu beisei an nih thu a sawi.

Press conference a neih hma hian Union Minister hian Mizoram sorkar hotute leh official-te a kâwm a; statistics lama Mizoramin hma a sawn theihna atan Support for Statistical Strengthening Scheme hnuaiah sorkar laipuiin cheng vbc. 15.18 state sorkar a pek thu sawiin, "SSS Scheme-in a tum ber chu, state-te statistical system tihchangtlun a ni. Chu chuan statistics dik leh rintlak a hun taka state-in a neihtir thei dawn a, chu chu ram hmasawnna atan a pawimawh," a ti.

Meeting-ah hian Lok Sabha MP CL Ruala, Planning minister Lal­sawta, PWD secretary Lalram Thanga, Planning secretary Dr C Van­lalramsanga te pawh an tel a ni.