Sikul khar vangin zirlai 850 vel exam lo

Mizoram Government Lumpsum Grant-in-Aid Higher Secondary School Association (MIGLAHSSA) leh School Managing Board ten June 18, 2018 aṭanga sikul an khâr chu an la chhun­zawm zel a; sikul pakuaa zirlai 850-te chu ni 21 chhung sikul an kal loh tawh bakah, first term exam ve thei loin an awm mek.

Tarlan tawh ṭhin angin, MIGLAHSSA hian lumpsum HSS pakuate chu adhoc grant-in-aid dinhmuna hlangkai turin Mizoram sorkar an phût a; an thil phût nawr nan June 18, 2018 aṭangin tiam chin awm loin sikul an khâr a ni a, vawiin hi thla khat a tlinna chiah a ni.

June 18 aṭanga nimin thlenga sikul an kal theih loh hun chhung chu holiday tel loin ni 21 a tling tawh.

Mizoramah lumpsum grant-in-aid HSS pakua a awm mek a; chu'ngte chu - Tuisualral HSS, Phu­l­len HSS, Farkawn HSS, NE Khawdungsei HSS, East Lungdar HSS, Thingsulthliah HSS, Zobawk HSS, West Phaileng HSS leh Zawl­nuam HSS-te a ni. Heng sikul pakuaah hian zirlai 850 vel an awm.

Tunlai hian school calendar angin Mizorama sikul hrang hrangah first terminal exam neih mek a ni a, July 16, Thawhṭanni khan ṭan a ni. Hetih lai hian MIGLAHSSA general secretary R Lalfakawma chuan, lumpsum aided HSS pakuate chu khâr mek a nih avangin, chu'ng sikul pakuaa zirlai 850 velte chu an exam ve thei ta lo tih a sawi.

Vanglaini zawhna chhangin R Lalfakawma chuan, sikul khâr a nih hnu leh sorkar hotute nen inbiakna an neih theih loh hnuah, tun hnai khan lumpsum aided school awmna khaw pakuaa Joint SU hruaitute'n chief minister Lal Thanhawla an hmu tih a sawi.

R Lalfakawma sawi danin, Joint SU hruaitute chu Chief Minister-in School Education Minister hnena kal turin a ti a; mahse, Joint SU hruaitute'n Education Minister hmuh an tum tawh a, awmzia a neih loh thu an sawi hnuah, Chief Minister chuan School Education Secretary hnena kal turin a ti leh a ni.

School Education secretary Esther Lalruatkimi chu New Delhi-ah a zin mek avangin Joint SU hruaitute'n an hmu thei rih lo a, kar leh lamah hmuh theih an inbeisei. R Lalfakawma chuan, Joint SU-in Chief Minister an hmuh theih avang leh CM thu anga School Education Secretary an la hmuh leh dawn avangin beiseina sang tak an nei tih a sawi a, "Hei chen hi sikul kan khar tawh a, School Education Secretary hmuh a nih hnu pawha sorkar aṭanga thu lawmawm kan hmu lo a nih chuan kawng danga hmalak a ngai tawh niin kan hria," a ti.

Lumpsum aided HSS awmna khaw pakuaa MIGLAHSSA member te, School Managing Board hotute leh students union hruaitute chu naktuk Ningani hian Aizawlah an inhmu khawm dawn a, an hmalak zel dan tur an rel dawn a ni.