KHAWTHLIR

Thisen pe
Serchhip Field Veng Branch KṬP chuan nimin khan Serchhip District Hospital tan thisen unit 15 an pe a, a petu mipa 10 leh hmeichhia panga an ni.

MTA thláwp
Mizoram Earthmover Owner's Union chuan thuchhuah siamin, Mizoram Tipper Association-in July 1, 2018 aṭanga Mizoram sorkara dan loa hnam dang tipper register-te Mizoram chhunga hna thawk (service) lo tura an dang chu an thlàwp tlat thu an tarlang.

Hrem ngei phût
Aibawk V/C leh tlawmngai pawlte chuan thuchhuah siamin, July 14, 2018 zing dar 8:30 vela BSF motor chak taka tlânin bike pakhat a tái a, bike khalhtu H Lallungkhama, Aibawk a thi chu pawi an tih thu an tarlang a, BSF motor khalhtu chu a phu tâwka hrem ngei an phut thu leh H Lallungkhuma chhungte hnenah zángnadawmna awm thei apiang pek an phût thu an sawi.

Centre hawng
Union minister for Statistics & Programme Implementation DV Sadananda Gowda chuan, nimin khan Aizawl DC complex-a Facilitation Centre din thar a hawng. Centre sakna atan hian Lok Sabha MP CL Ruala leh Rajya Sabha MP Ronald Sapa Tlau ten MP fund Rs. 2,50,000 ve ve an thawh a ni.

Enfiah zo
Lawngtlai district-in páwn lama inthiar awm lohna, open defecation free (ODF)-a an inpuan chu a dik leh dik loh finfiah turin tunlai hian State Level Verification team-te'n Lawngtlai district an fang mek a; RD block hrang hrangah insem darhin, nimin khan Sangau RD Block leh Lawngtlai RD Block-a khaw thlan bikte an enfiah a, enfiah hna zawh nghal a ni.

CM Relief Fund
Mizoram Truck Drivers’ Association chuan Chief Minister's Relief Fund atan Rs. 20,000 an pe. Chief Minister chuan, mi harsate ṭanpui duhna thinlung pû a, ṭhahnemngai taka sum leh pai Relief Fund-a chhùn luh a nih avangin lawmthu a sawi a, "Ṭangkai taka hman a ni ngei ang," a ti.