Operation Mizoram leh Wake Up Mizoram ten An din chan leh hmalakna turte an puang

Mizorama pawl thar, Operation Mizoram (OM) leh Wake Up Mizoram hruaitute chuan nimin Aizawl Press Club-ah thuthar thehdarhtute kâwmin, an din chhan leh hmalakna turte an puang a; kumina Assembly inthlanpuiah a ṭul a nih chuan candidate an siam ve tur thu an sawi.

Operation Mizoram convener Vanlalhuma Colney chuan, kumin hi ram chhan chhuah leh siam ṭhat kumah an puang tih sawiin, "Mipuite'n hmasawnna dik leh thlei bik nei lo kan beisei ṭhin a, amaherawhchu, kan ram roreltute sûkthlêk, mahni ṭánghma ngaihna leh party âtchilhna avangin vawiin thlengin hnam hnam hian rahbi a rap dik thei lo hi a pawi hle a ni," a ti a; a ṭul ang zelin kumin inthlanah mipui aiawh candidate siam thlenga hma an lak dawn thu a sawi a ni.

Vanlalhuma Colney sawi danin, Operation Mizoram hian Wake Up Mizoram Mission Core member turte a ruat a; chutah chuan C Lalrosanga chairman niin, Rev. Lalzuithanga vice chairman a ni a, secretary chu Rosiamliana Ralte niin, assistant secretary chu SR Lalsanglura a ni.

Operation Mizoram chu political issue khawihtu tur bik a ni a, Wake Up Mizoram chu Pathian thu hmanga ram siam ṭhatna lam khawih tur a ni thung.

Wake Up Mizoram chairman C Lalrosanga chuan, Mizoram chu Chanchinṭha zawn chhuah ram a nih thu sawiin, Pathian duh zawnga nun chu ram leh hnam dinchhuahna tura an ngaih thu a sawi a, "Theihtawpa Pathian leh mipui rawngbawl turin kan pên chhuak a ni," a ti a; an thupui chu 'I din thar leh ang u' (Nehemia 2:17b) a nih thu sawiin, Mizoram mipuite thawhpuiah a sáwm.

Wake Up Mizoram vice chairman Rev. Lalzuithanga chuan, Mizorama thil ṭha zawng zawng leh hmasawnnate chu Chanchinṭha vanga awm a nih thu sawiin, "Chanchinṭha kan hawisan avangin kan ram a damlo a, Chanchinṭhaah kan kir leh a ngai. He ram damna tur hi political party te, sumahtee leh development-ahte a awm lo," a ti a; Mizoram damna chu pathian thu leh Isua Krista-ah chauh a awm thu a sawi.

Rev. Lalzuithanga chuan, politics chu thil ṭha a nih laiin, Mizote erawh chu party politics-ah an tuipui lutuk chu ramin a chhiat phah thu a sawi a, "Politics kan buaipui dan hi a him lo. Party politics hi bànsan ila, Chanchinṭha hmangin politics i buaipui ang u," a ti. Zawhna chhangin Rev. Lalzuithanga chuan, MPF hmalakna an thlawp thu a sawi a, "MPF hmalakna atana remchang chiah lote kan thawk dawn a ni," a ti.

C Lalrosanga chuan zawhna chhángin, Operation Mizoram leh Wake Up Mizoram movement chu kal zel tur a nih thu a sawi a, "Inthlan hma leh hnuah kan kal zel dawn," a ti. Rev. Lalzuithanga pawhin, "Tun inthlan hi kan tinzâwn ngawr ngawr lo a, kan duh ber chu, he ramah hian Pathian duh dana kan ram hruai leh party kalpui a ni a; kan ramah hian Sovereignty of God awm se kan duh ber a ni," a ti bawk.

Vanlalhuma Kawlni sawi danin, Operation Mizoram hian Mizoram Assembly constituency tinah mipui ngaihdan lakna an siam dawn a, chutah chuan Mizoram MLA atana an duhte hming ziahna an siam dawn a ni.

Wake Up Mizoram Mission thil tum tlangpui:

1. Chanchinṭha hmanga Mizoramah mipui inrêlbàwlna ṭha zawk thlentir; ruihchilh khawpa party politics tireh tura mipui auh harh.

2. Mipuiin an chanvo dik tak an chan a, mi dang chan ái chhuhsak lo tura inzirtir.

3. Politics dik inzirtirna lama hmalakna a tam loh avang leh tuna kalphung a fuh loh em avangin mi tam tak an beidawng a, vote thlak châkna nei lo, phûrna nei lo leh vote tur hre lo an tam. Hmasawnna rualkhai zawk leh inrelbawlna ṭha zawk siam tura mipui tihharh.