Hnam insawichhiatna MZP-in an dem

MZP general headquarters chuan thuchhuah siamin, hnam inpumkhatna tichhe thei zawnga insawichhiatna a awm leh ṭhin chu pawi an tih thu an tarlang a; tun hnaia social media-a Hmar hnamte tana hriat nuam lo thu thehdarh a ni chu an dem thu an sawi.

MZP chuan, tun hnaiah mi ṭhenkhatin Hmar rilru tina zawng leh chi inthliarna ang zawnga social media hrang hrang­a post a awm chu pawi an tih thu sawiin, "Heng post siamtute hi kan dem tak zet. Tun hnuah hetiang thil hi thleng nawn tawh lo turin kan duh tak zet a, hetiang chi inthliarna ang zawnga thu delhkilh post hi a awm tawh lohna turin Zoram mipuite i fimkhur ang u," an ti.

Zo fa ṭheuh ṭheuh, inhmuhsitna leh diriamna ṭawngkam bawlhhlawh hmanga thu chhuah leh thu belhchian dâwl loa inpuh ang chi chu tun hnuah thleng tawh lo se an duh thu sawiin MZP chuan, "Hnam inhmuhsitna rawngkai ṭawngkam kan hre leh a nih chuan a tawp thlengin hma kan la ang," an ti a; Mizote chu hmun hrang hrang awm mah se, unau an nihna a bo chuang lo tih an sawi.