Larsap hoin CADC meeting neih a ni

Chakma Autonomous District Council (CADC) meeting chu nimin khan Raj Bhavan-ah neih a ni a, Governor Kummanam Rajasekharan leh chief minister Lal Thanhawla ten an telpui.

Governor chuan, sor­kar hnuaia hlawh late chu mipui tana thil ṭha eng emaw tal ti tura phuar an nih thu sawiin, "Kan hnaah kan rintlak tur a ni a, langtlang takin kan thawk tur a ni. Mipui sum kan hman reng reng a nihna ang tur taka hman tur a ni a, chéng khat pawh kan hlêp tur a ni lo," a ti.

CADC hotute chu an huam chhunga theihna awmte zawng chhuak tura chahin Larsap chuan, "DPR ṭha tak siam ula, in sum lak luh tihpun tum rawh u," a ti a; meeting-a telte tihpuitlin a nih leh nih loh hriat a nih theihna atan meeting nei ngun turin a hrilh.

Chief Minister chuan, thuneihna an chanin ADC-te hnathawhnaah an inrawlh ngai loh thu a sawi a, "Zalen takin ADC-te hian hna an thawk tur a ni. A chhan chu an mipuite an hre chiang a, an mamawhte state sorkar aiin an chiang zawk. State sorkar chuan an thuneihna tihpun zel a tum a ni," a ti.

Meeting-ah hian CAG-in CADC an chhui chianna te, hmasawnna lam te, hriselna leh zirna lam te, thawktu lak chung­changte leh CADC inrelbawlna chung­changte sawiho a ni.