Legal Volunteer-te tan workshop buatsaih

Nimin khan Champhai Sub-Headquarters YMA Hall-ah Workshop for Para Legal Volunteers on PLV Public Relations buatsaih a ni a, Mizoram State Legal Services Authority (MSLSA) member secretary Vanlalen-mawia'n a hmanpui.

Vanlalenmawia chuan, Mizoramah para legal volunteer (PLV) 299 an awm a, State Legal Services Authority hnuaiah Aizawl bikah thawktu 25 awmin, district dang zawngah pa­hnih vel ṭheuh an awm thu a sawi a, "PLV-te hi ukil rawih ngai loa mipuite dan lama puitu, mipuite harsatna chinfel a nih theihna atana dan hmaa hruai thlengtu an ni," a ti.

Champhai additional district & session judge Vanlalena pawhin thu sawiin, PLV-te chu a taka mite ṭanpui tura pên chhuak ṭhin an nih thu a sawi a, "PLV-te hi chhanchhuah ngaite chhan chhuaktu in ni. Inthlahdah loa hna kan thawh chuan khawtlang a nuam anga mi dangte tan malsawmna kan ni thei dawn a ni," tiin, an district chu mi chi hrang hrang tamna a nih avang­in dawh thei taka inpek a ngaih thu a sawi.

Chawhnuah Kolasib chief judicial magistrate Sylvie Zomuanpuii Ralte-in PVL-te mawhphurhna leh hna thawh dan tur a sawi a, assistant public prosecutor T Lalṭhafamkima'n social media hman khaw loh laka invenna leh hremnate a sawi thung.