Ramriah a ṭul anga inbe turin Mizoram sorkar a inpeih tawh ; Ramri chinfel a awlai lo - Home Minister

Home minister Lalchamliana chuan Assam nen ramri chungchanga inbiakna nei turin Mizoram sorkar a inpeih tawh thu leh ramri chinfel chu thil awlai a nih loh thu a sawi.

Nimina Synod Multipurpose Training Centre-a lehkhabu thar ‘Mizoram leh Assam Ramri Buaina’ tih a tlangzarhnaah thu sawiin Home Minister chuan, "Mizoram sorkar chu 1875 BEFR notification-ah a dingnghet a, Assam lam chu 1933 notification ah an ding thung a ni. Ramri chingfel tur chuan pakhat duhdan ngawt a tlang thei lo," a ti.

Lalchamliana chuan ramri chingfel turin lehlam lehlam inrem a ngaih avangin ramri chinfel chu a awlai lo tih sawiin, "India ram leh ram dang inrina buaite pawh hun rei tak buaipui hnuah pawh chinfel theih a ni rih lo," a ti a, state ramri chingfel tur pawhin Boundary Commission dinte pawh awm mah se, ramri chinfel tak tak hi chu a har an tih thu a sawi.

Home Minister chuan February, 2018-a Zophaia Mizo zirlaite buk sak Assam sorkarin a rawn ṭhiah sak a, silai hmet puaka zirlaite an um darh vak hnu khan Mizoram sorkar chuan ramri chungchang ngawrh lehzuala buaipui turin Chief Secretary kaihhruaiin Core Committee a din thu sawiin, "Chumi hnuah sorkar lo ding tharin Dy. Chief Minister chairman na hnuaiah Boundary Committee a din a ni," a ti.

Home Minister sawi danin, Boundary Committee hi member pawh a huamzau thei ang ber tura ngaih angin political party leh NGO pawl liante tel kim thei ang berin din a ni. Committee-te'n ramri chinfelna atana lehkha pawimawh (document) lak khawm leh an hna thawh tawh chinte sawiin, Mizoram sorkarin a duh angin a ṭanhmun turte tichiangin document-te pawh a nei ṭha thawkhat tawh a ni.

Ramri buaina chungchangah political party leh NGO hrang hrang aiawha Boundary Committee-a telte pawh an lungrual tlang viau tih sawiin Lalchamliana chuan, "A ṭul anga inbiakna nei turin Mizoram sorkar a inpeih," a ti.

Lehkhabu hi Mizoram leh Assam ramri buaina chungchanga ziaktu mithiam hrang hrangte thuziak dahkhawmna niin SBI asst. general manager (Rtd.) Lalṭhuamliana lakkhawm a ni.

Mizoram leh Assam Ramri Buaina tlangzarh a nih hnu hian Govt. T Romana College-a asst. professor Dr Joseph K Lalfakzuala kaihhruaina hnuaiah ramri chungchang sawiho nghal a ni.