Scholarship pek kim thuai beisei

Mizoram Scholarship Board (MSB) chuan nimin khan zirlai 2,600 vel hnena post matric scholarship pekna tur a pawm belh a, a hma-a an lo pek tawh nen dilnaa tih dik loh engemaw awmte tih loh chu pek kim thuai beisei a ni.

MSB secretary PL Ramliana chuan Vanglaini palai zawhna chhangin, scholarship pek kawnga bank lama clear theih loh ang chi a awm vak tawh lo tih a sawi a, "Vawiin (December 7, 2021)-ah pawh scholarship pek tur 2,600 vel kan approve leh a, heti hian bank account dik ho chu kan pe kim thawkhat tawh. Vawiina kan pek hman loh tur hi 600 vel bak an ni lo ang, an tam tawh lo," a ti.

Dilna zawng zawng erawh pek kim theih a nih loh thu sawiin MSB Secretary chuan, bank IFSC code dik lo te, document fel lo te, verify loh leh reject-te an awm thu a sawi.

Zirlai hruaitu ṭhenkhatte hnen aṭanga Vanglaini thudawn danin, zirlaite'n December 3, Zirtawpnia lungawi lohna an lantir hnuah Pathianni khan chawhma dar 10 vel aṭangin zirlai eng emaw zat bank account-ah scholarship a lut ṭan a, chumi hnuah nimin aṭang khan a luh belh leh a ni.