KHAWTHLIR

Raltlan ṭanpuina
Central YMA CEC tunhnaia ṭhukhawm chuan Myanmar aṭanga Mizorama raltlante ṭanpuina atan cheng nuai 10,00,000 bakah thawmhnaw, bungbel etc. an sem chhuak. Ṭanpuina hi Aizawlah cheng nuai 2, Champhai Sub. Hqrs. YMA leh Hnahthial Sub. Hqrs. YMA hnenah cheng nuai 3 ve ve, Lunglei leh Serchhip Sub. Hqrs. YMA hnenah cheng nuai 2 ve ve, Khawzawl leh Saitual Sub. Hqrs. YMA hnenah Rs. 10,000 ve ve, Mamit leh Kolasib Sub. Hqrs. YMA hnenah Rs. 5,000 ve ve, Chhimtuipui Group YMA hnenah Rs. 80,000 leh Central YLA hnenah Rs. 50,000 sem a ni.

Thisen pe
Samthang Branch YMA chuan nimin khan Samthang BNRGSK building-ah Krismas pual thisen pek runpui an huaihawt a, thisen unit 56 an pe. Thisen pettute chu mipa 49 leh hmeichhia pasarih an ni. Chaltlang HSS, NSS unit pawhin nimin khan Aizawl Civil Hospital blood bank tan thisen unit 40 an pe a, petute mipa 35 leh hmeichhia panga an ni. St. John's HSS, Kolasib NSS-te chuan nimin khan Kolasib District Hospital blood bank-ah Krismas pual thisen pek an huaihawt a, mipa 11 leh hmeichhia pathumin thisen unit 14 an pe. Sihphir Vengthar bial KṬP pawhin Synod Hospital blood bank tan thisen unit 33 an pe a, a petute chu mipa 28 leh hmeichhia panga an ni.

Training dawn
Information & Public Relations (IPR) department buatsaihin nimin khan Mizoram Journalist Association member-te leh IPRO 12-te chuan PRIDE, Lok Sabha, New Delhi-ah training turin New Delhi an pan a, training-a tel turte hi IPR pisa aṭangin IPR director Lallianpuii leh MJA hruaitute'n an thlahliam a ni.

UPC (M) puipate
Mizoram UPC executive nimina ṭhukhawm chuan kum 2022-2023 atana hruaitu thlan ngaite an thlang thar. Kum 2022-2023 Mizoram UPC puipa atan hian general superintendent-ah Rev. Thangliansanga, Dinthar Veng, Aizawl; general secretary-ah Rev. Saienga Sailo, Khawzawl Vengthar; Southern Zone Area secretary (sub-office) atan Rev. PCParliana, Bethlehem Veng leh ATI principal (2022 - 2026) atan Rev. P Lalrinawma, Dinthar Vengte thlan an ni.