Bamboo link road atana ṭha tur Karleh aṭangin enfiah a ni dawn

Chief minister Zoramthanga hoin nimin khan CM Conference Hall-ah Bamboo Development Board member-te chuan bamboo link road chungchanga hmalakna tur hrang hrang an sawiho a, bamboo link road atana ram rem ṭha en turin karleh lamah fehchhuah nise an ti.

Zoramthanga chuan meeting koh a nih chhan sawiin, tunhnaia Union Finance minister Nirmala Sitharaman hnena Mizoram mamawh a thlen zinga Bamboo Link Road Pilot Project a tel thu sawiin, "Hemi kalzelah hian bamboo link road siamna hmun hma en thlithlai leh area identification chungchang sawiho a ngaih vang a ni," a ti.

Union Finance Minister chuan cheng vbc 100 vel DPR siam tura thurawn a lo pek thu sawiin Zoramthanga chuan,"A tirah Aizawl district chhunga pilot project siam phawt a ni," a ti a, bamboo link road hi feet 18 vela zau, pavement feet 10 a siam tum a nih thu a sawi.

Meeting chuan bamboo link road atana ram rem ṭha en turin karleh lamah fehchhuah nise, report-te ziah fel a nih hnuah December thla tawp lamah Bamboo Link Road Board leh Bamboo Development Board joint meeting neih nise an ti a ni.

Chief Minister hi additional chief secretary JC Ramthanga, adviser to chief minister (technical) K Lalsawmvelate'n an ṭawiawm.