MBOCWWB member ennawn dawn Danin a huam loh member an tam

Mizoram Building & Other Construction Workers Welfare Board (MBOCWWB) hnuaia member inziaklutte chu ennawn an ni dawn a, danin a huam lohte chu paih an ni ang.

Vanglaini palai zawhna chhangin Labour Employment & Skills Development Entrepreuneurship (LESDE) minister Lalchhandama Ralte chuan MBOCWWB member ennawn an nih dawn thu hi a sawi a, "Danin a huam loh member engemawzat an awm a, chungte chu zawng chhuakin paih an ni ang," a ti a, tun dinhmunah member 70,000 vel an awm mek thu a sawi.

Lalchhandama Ralte chuan danin a huam loh member an zawn chhuahrual hian member ni ngei tur nihna chang hre si lote an zawn chhuah dawn thu sawiin, "Member ni thei tura danin a tihte chuan hamṭhatna an dawn ngei theihna atan member ni vek se kan duh. Tunhnaia an hnathawhna hmuna nunna chan zingah pawh member ni lote an awm a, zangnadawmna pek theih an ni si loa, a pawi hle," a ti.

LESDE Minister chuan Covid-19 avangin labour cess lut a tlakhniam thu sawiin, "Kum 2019-2020 khan labour cess hi cheng vbc. 20 a nih laiin, kum 2020-2021 ah chuan cheng vbc. 14 ah a tla thla. Kum 2021-2022 ah erawh labour cess lut a ziaawm leh a, financial year a la zo lo chungin nikuma kan hmuh chu kan khum tawh," a ti a, hnathawh theih hunlai a nih avangin 2019-20 pawh khum theih a nih thu a sawi.

MBOCWWB member-te chu an hamṭhatna dawn tur ang an pek zel theih thu sawiin Lalchhandama Ralte chuan, "MBOCWWB hi deficit-in kan la awm ngai lo. Kan harsatna tawh ber erawh bank transaction fail hi a ni a, chhan hrang hrang avangin a fail ṭhin. Heivang hian member ṭhenkhatin an hamṭhatna an dawn tur ang a hunah an hmuh theih loh phah ṭhin a ni," a ti.

LESDE Minister sawi danin, MBOCWWB member-ah hian kum 18-60 inkar contractor emaw midang hnuaia kum khata ni 90 tal inhlawhfate an inziaklut thei a ni. Inziah luh man a tirah Rs. 25 pein, thla tin membership tih nunna atan Rs. 10 pek ziah a ngai a, kum khat atan pawh pek tlak nghal theih a ni.

Covid-19 avangin member-te tan scheme hrang hrang ruahman a nih thu sawiin Lalchhandama Ralte chuan, "Danin min phalsak chinah hamṭhatna awmsate bahlah chuang lo turin special scheme duan a ni. Covid-19 dinhmun a zir te, sum neihdan a zirtein special scheme hi a ṭul anga ngaihtuah zel a ni ang. Hamṭhatna awmsa tibahlah tura special scheme siam erawh phal a ni lo," a ti.

Covid-19 vanga special scheme :
• Free ration atan Supply department-in an mamawh zat an sawi angin thla 1 atan cheng vbc. 6 kan pe. (Member lote pawhin free ration hi an dawng)
• Covid-19 thawhkhatnaah member zawng zawng hnenah Rs. 3000 pek an ni. Covid thawhkhatna lai hian mi 50,000 vel member an awm
• Covid-19 thawhhnihnaah member Covid-19 vei in lama inenkawlte chu Rs. 10,000 pek tur an ni a, hmun danga (CCC, CCCC) enkawl ngaite chu Rs. 10,000 bakah an inenkawl chhung nitin Rs. 1000 pek tur an ni. Covid-19 avanga thite chu cheng nuai 3 pek tur a ni. He special scheme hian November 31, 2021 thleng a huam
• Covid-19 vei in report mi 1,708 an awm tawh a, chung zinga 442 chu in lama inenkawl niin, mi 1283 chu hmundanga enkawl an ni. Covid-19 avanga thi pathum an awm tawh