Hri vei thar 330 hmuh belh

December 6, Thawhṭanni khan Mizoramah Covid-19 vei mi 330 hmuh chhuah a ni. Nimin khan tlai dar 5 thlengin hripui vei dam tawh mi 354 chhuahtir an ni a, mitthi tarlan a awm lo; hripui vei enkawl mek mi 2,766 an awm a, hripui vei tawh aṭangin 2.02% a ni.

Thawhṭannia Covid-19 vei hmuh tharte chu mipa 142 leh hmeichhia 188 an ni a; ZMC RT-PCR a hmuh 40, TrueNAT hmanga hmuh 19, RAT hmanga hmuh 260 leh FIA hmanga hmuh 11 an ni.

IDSP record angin, Mizoramah Covid-19 vei 1,36,784 hmuh chhuah a ni tawh a, mipa 66,019 leh hmeichhia 70,765 an ni a, mipa aiin hmeichhia 4,746-in an tam zawk. Nimin tlai dar 5 thleng khan mi 1,33,510 (97.60%) chhuahtir an ni tawh a, mi 508 (0.37%) thi tawhin, enkawl mek mi 2,766 (2.02%) an awm.

December 6, Thawh­ṭannia Covid-19 vei hmuh thar mi 330 zingah symptom nei mi 209 an awm a, mi 121 erawh chuan symptom an nei lo.

Thawhṭannia swab sample endikah positivity rate 10% chung lam district panga a awm a, positivity rate sànna ber Hnahthial district-ah 30% a ni. Positivity rate 10% chung lam dangte chu - Serchhipah 12.37%, Lungleiah 11.74%, Lawngtlaiah 11.36% leh Champahiah 10.11% a ni.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 6, 2021 thlenga swab sample endik tawh 14,50,508 aṭanga RT-PCR hmanga endik zat percentage chu 22.48 a ni a, RAT hmanga endik zat chu 71.61% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,36,784 chu mi 1,000 zelah hripui vei mi 124 an awm ang a ni a; mi 1,00,000 zela Covid-19 vangin mi 46 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 354 an chhuak a; Aizawl district-ah 189, Lawngtlai district-ah 36, Saitual district-ah 35, Serchhip district-ah 29, Champhai district-ah 17, Khawzawl district-ah 15, Lunglei district-ah 12, Serchhip district-ah 11, Mamit district-ah 10 an ni.