Raltlan dahna tur awm mumal loh vangin Champhai YMA-in an awmna tur buatsaih

Champhai Sub. Hqrs. YMA bultumin tunhnai khan hnatlangin Champhaia ITI building-ah Myanmar buaina avanga raltlante awmna hmun tur buatsaih a ni. Tun dinhmunah Champhai khaw chhungah raltlante dahna tur a awm mumal tawh lo.

Champhai Sub. Hqrs. YMA president F Lalrinmuana chuan an district chhunga raltlante chu mimal leh pawlho chhawmdawlna avangin chhuanchhamin an la awm lo tih sawiin, sahimna zawnga Mizorama rawn raltlante ṭanpui kawnga inhawng zel turin mipui a sawm a ni.

Hnatlangah hian Champhai Sub. Hqrs. YMA hnuaia branch pali - Zote, New Champhai, Zion Veng leh Bethel Veng Branch YMA member-te an thawk chhuak a ni. ITI building-ah hian mi 1,000 vel dah theih beisei a ni.

Champhai Sub. Hqrs. YMA huam chhungah tun dinhmunah raltlan mi 6,000 vel an awm mek a, chungte chu Tuipuiral Group YMA huam chhungah raltlan hi 2585 awm mekin, Vanhnuailiana Group huam chhungah 2000 vel leh Champhai khawpui chhungah 2000 chuang an awm.