Aieng herna khawl thar hawng

Lunglei High Powered Committee (HPC) vice chairman Lawmawma Tochhawng chuan nimin khan Lunglei district hmun thuma bun tur aieng herna khawl ‘Leitlang Aieng’ tih chu a hawng. Leitlang Aieng tan hian HPC sum cheng nuai 15 hman a ni.

Lawmawma To­chhawng chuan Lunglei district-a mipuite an intodelh nan aieng herna khawlte chu lei a nih thu a sawi a, “Aieng chin kawngah loneitute’n theihtawp in chhuah a ngai dawn. Aieng chi hi HPC aṭangin ngaihtuah zui tur a ni,” a ti a, Lunglei leh a chheh vel khuate aienga an intodelh hnuah zau zawkin chhimlam mipui tan hmalak zui tum a nih thu a sawi.

Aieng chauh ni lo, thlai chi hrang hrangah Lunglei district a intodelh theih nan Agriculture leh Horticulture department-te nen ṭang hoa hma an lak mek thu sawiin HPC Vice Chairman chuan, Lunglei khawthlang lam ram ṭhate chu bawh a, a hun lo lai (off season)-ah pawh thlai thar thei turin tui lakna tur hnathawh ṭan mek a nih thu a sawi bawk.

Aieng herna khawl pathumte hi Lunglei khawpuia Mualchin Food Processing, Rahsi Veng leh BB Aieng, Ramthar bakah, Lungsen khuaa Lungsen Aieng Farming Co-operative Society-ah te bun tur a ni.