Khawbung Mini Sports Complex hawn a ni

Rural Development (RD) minister Lalruatkima chuan nimin khan DoNER Ministry hnuaia Non-Lapsable Central Pool of Resources (NLCPR) kaltlanga RD department-in project lian a kalpui hmasak ber, cheng nuai 369.89 senga sak Khawbung Mini Sports Complex a hawng.

Lalruatkima chuan hrileng avanga kum hnih dawn hun harsa tawn a nih hnua Khawbung Mini Sports Complex hawn theiha peihfel a ni chu lawmawm a tih thu a sawi a, "NLCPR kaltlangin Aibawk, East Lungdar leh Khawbungahte Mini Sports Complex sak hna kalpui a ni a, mihringte hriselna leh theihnate hailang thei turin infiamna hmunhmate thawmṭha chung zela hmalak ṭhin a ni," a ti a, infiamna hmunhma ṭha tak an neih thar chu ṭhalaite'n chhawr ṭangkai se a duh thu a sawi.

Sports Minister nen an inrawn hnuah External Aided Project (EAP) kaltlanga Khawbung Mini Sports Complex-ah phullem (artificial grass) phah tura hmalak tum a nih thu sawiin RD Minister chuan,"TATA Trust Football Academy dah tum a ni a, football academy aṭangin inthununna leh aia upate zahna zir a ni tel dawn," a ti a, sorkarin hmasawnna ruhrel hrang hrang a chhawpchhuahte chu neitu thinlung pua enkawl tur leh theihtawp chhuaha sorkar ṭawiawm zel turin mipuite a sawm nghal.

Bialtu MLA Ramthanmawia pawhin thu sawiin,"Sorkar hmasa aṭang tawha ruahmanna felfai tak siama infiamna project lian tak duan a ni hi a lawmawm. Hmabak la awm angte hotute nen enzui zel a ni ang," a ti a, a bial chhung hmasawnna ruhrel hrang hrang siamte a tahtawla hawn zel tum a nih thu leh hmasawnna dangte pawh siam tuma hmalak chhunzawm mek a nih thute a sawi.

Khawbung Mini Sport Complex hi NLCPR hnuaiah Advance Consultancy, Republic Veng, Aizawl chuan January 4, 2017 aṭanga thawk ṭanin July 14, 2020 khan an siam zo a ni.