Congress ṭhalaiin PPE thui man Krismas hma-a pek ngei an phut

Mizoram Pradesh Youth Congress Committee (MPYCC) chuan thuchhuah siamin, mi 60-in PPE hak 3191 an ṭhui man sorkarin a batsak nia tarlangin, “Krismas hma ngeiin pe rawh se,” an ti.

Covid-19 avangin PPE indaihlohna a nasat bakah, phai lam aṭanga chahluhte a man a to avangin mimal ṭhahnem takin ṭhuiin sorkarin a lak sak tih tarlangin MPYCC chuan, “Sorkarin PPE ṭhuitute bill a batsak zat hi a vaiin Rs. 4,78,650 a ni. A ṭhuitu zawng zawng 60 niin, pakhat hi Rs. 150 in an ṭhui a ni,” an ti a, thil tam tham lo tak sorkarin a ngaihthah tlat pawi an tih thu an sawi.

MPYCC chuan PPE ṭhuia inhlawhte hi mipa pakhat bak zawng chu hmeichhia an nih thu tarlangin, “A ṭhui tam berin 100 ṭhuiin Rs. 15,000 an bat sak a, a ṭhui tlem ber hian 20 ṭhuiin Rs. 3,000 batsak a ni. A ṭhuitute hi harsa ve tak tak an ni a, Covid-19 do nana tlawm taka an theih ang tawk chhuaha ṭhui an ni a, an bill ngaihthah a ni tlat mai hi hriatthiam har kan ti,” an ti.