Halpuah hal lo turin mipui ngen

Mizoram State Pollution Control Board (MSPCB) chuan thuchhuah siamin, Krismas leh kumthar vuakveta mipui him tlanna leh boruak a lo thianghlim theih nan halpuah hal lo turin mipui an ngen.

MSPCB chuan halpuah hal chuan hriselna leh boruak tan nghawng ṭha lo a neih avangin Supreme Court-in halpuah hal chungchangah thupek a lo chhuah tawh ṭhin tih a tarlang a, “Heng a thupekte hi nemnghetin October 29, 2021 khan thupek a chhuah nawn leh a, mipuite leh thuneitute’n ngai pawimawha zawm ngei tura hriat nawn tir kan ni,” a ti.

Halpuah hal chuan boruak a tih bawlhhlawh avangin mihring hriselnaah nghawng ṭha lo a neih thu tarlangin MSPCB, “Chuap, mit leh bengte hi a khawih pawi thei hle a, a puak ri bengchheng hian mipuiah chiaina a thlenin dam lo leh tar chak lote tan harsatna a thlen nasa bik,” an ti a, kum upa, taksa chak lo leh naupangte hriselna khawih pawi thei zawnga chet phei chu a rem lo lehzual tih a tarlang.