P&E Minister-in electric hrui zam thar a hawng
Power & Electricity (P&E) minister R Lalzirliana chuan nimin khan Maite khuaah SEDP sum cheng nuai 115 senga Mualpheng aṭanga Maite inkar - 11 kVA electric hrui zam thar a hawng.
R Lalzirliana chuan Maite khuain kawlphetha an dawn mek thlaktu tur line thar sub-station lian zawk kaltlanga an dawng tur chu hmasawnna a nih thu sawiin, “Sorkarin state dang aṭangin kawlphetha lei nan sum tam tak a seng a, chuvangin kawlphetha renchem hi kan inzirtir leh kan ngaihpawimawh a ṭul hle. Ho te a lang, chhuna ṭul loa eng chhit te, pindan awm lohna a eng chhitte leh mamawhna awm miah loa current hmante hi kan chin loh a ṭha,” a ti.
Sorkarin kawlphetha ṭha zawka mipuite a pekna kawngah tunhnaia line thar 132kv Melriat- Lunglei leh 132 Kv line Serchhip - E Lungdar inkar hawn tharte chuan kawlphetha hlohna (transmission loss) a tih tlem a beisei thu sawiin P&E Minister chuan, Bairabi - Mamit - West Phaileng - Marpara line thar pawh hawn thuai beisei a nih thu a sawi.
Line thar hawn hmang hian Maite khua chuan 132kV sub-station Saitual aṭanga Mualpheng kaltlangin kawlphetha an dawng tawh dawn a, hei hian mipuiin bill an pekna kawngahte awlsamna a siamsak dawn bakah line pakhat a chhiat pawhin line dang aṭangin kawlphetha an dawng thei dawn a ni.
A line hlui Chhingchhip-Hmunṭha-Maite hi km. 38 athui niin tuna line thar Saitual-Mualpheng-Ṭawizo-Maite hi km 23.70 a thui a ni thung. Mualpheng - Tawizo realignment atan cheng nuai 41.75 sen niin, 11kv line thar Ṭawizo - Maite zam nan cheng nuai 73.33 sen a ni bawk.