MP-in Union Minister a kawm

Lok Sabha MP C Lalrosanga chuan December 6, Thawhṭanni khan Parliament House, New Delhi-ah Communications, Railways, Electronic & IT minister Ashwini Vaishnav a kawm a, Mizorama inbiakpawhna leh internet connectivity a ṭhat tawk loh thu a hrilh.

C Lalrosanga chuan Mizoram ramri hrul hmunahte BSNL leh company dangte network leh signal tih ṭhat a ṭul thu a sawi a; Ashwini Vaishnav chuan Mizoram leh hmarchhak state dang ṭhenkhata harsatna leh mamawhte enfiah turin sorkar laipui official-te a tirh tur thu a lo hrilh tih sorkar thuchhuahin a tarlang.

Phai lam leh Mizoram inkara dâk-a thil thawn a chak tawk loh ṭhin thu sawiin C Lalrosanga chuan, hma la turin Union Minister chu a ngen bakah, Mizorama relkawng phahna tura leidawh leh leiverh siam hnate chak zawka a kal theih nan Bairabi aṭanga Sairang thlenga relkawng phahna-a tualchhung harsatna awm ṭhinte enpui turin a sawm nghal bawk.