Aitlanga ram nei mi eng emaw zatin an ramah hna an la thawk ngam lo

Vairengte Aitlanga rama ram neitu mi eng emaw zat chuan Assam Police-te avangin an ramah hna an la thawk ngam rih lo. Ram neitute hian an harsatna tawh hi thuneitute hnenah an thlen tawh a, chhanna an la dawng lo.

Mizoram leh Assam sorkarin ramri buaina a neih kalzelah June 29, 2021 aṭang khan Assam Police-te chu Aitlang rama Mizote huanah inkulhin, awm hmun an bengbel chho a ni. Assam Police-te hian an inkulhna bakah hian an duty-na hmun aṭanga lang phak chin ramah chuan ram neitute hnathawh an phal lo a ni.

Aitlanga ram neitute hnen aṭanga Vanglaini thudawn danin, Assam Police-te an inkulh avang hian mi 18 chuan tun dinhmunah an ram an chan a ni. Anni bakah hian Assam Police-te'n an hmuh phak chiah loa ram nei eng emaw zat pawhin, an ramah hna an thawk ngam bik lo a ni.

Aitlang ramah hian Mizoram Police-te pawh hmun eng emaw zatah duty-in, awm hmun an bengbel ve a ni. Mizoram Police-te duty vang hian hnamdang panga vel chuan an ramah hna an thawk ngam lo. Aitlanga ram neitu Mizo ṭhenkhatte chuan hnamdang hnenah an ram an hralh a, chung ram leitu hnamdangte chuan hna an thawk ngam rih bik lo a ni.

Ram neitute chuan dinhmun hrehawm takah an din mek thu sawiin, "Kan ramte hi kan eizawnna ve ber a ni a, enkawl thei loa kan awmzui ta mai hi a hrehawm takzet. Sorkar aṭangin engmah thudawn kan nei lo. Kan ramte hi enkawl leh thei ngei ila kan duh hle. Tun dinhmunah chuan ramria sorkar hmalak dan hi keini tan chuan a lungawithlak ve loh," an ti.

Aitlanga ram neitute hian August 9, 2021 khan chief minister Zoramthanga hnenah memorandum thehlutin, "Kum 50 chuang zet kan lo enkawl tawh, Mizoram chhung ngei Assam lamin min rawn hnehchhuh mai leh kan thlaite an rawn suasam chiam mai hi a mak kan tiin hriatthiam a harsa kan ti takzet. Hmalak vak ngaihna leh a kawnghmang pawh kan hriat loh avangin sorkar hmalakna kan ngaichang tawp," an ti.

Tha leh zung tam tak senga kan lo enkawl an huan sawisak a ni chuan an rilru a tihnat takzet thu Chief Minister hi hrilhin ram neitute chuan, "Assam Police-in kan ram min laksak zat hi ṭin 80 leh a chanve vel a zau niin, kum tin Rs.2,000,000 chuang man thlai kan thar chhuak ve ṭhin," an ti a, an thlai thar rah chu kum telin a man a tam ve tial tial thu an tarlang.