A ṭum thumna atan NH 44A-ah Revised estimate siam leh a ni

Kum 2011 aṭanga hnathawh ṭan, Mamit district kaltlanga Tripura pawh tur kawngpui NH 44A siam hna thawh mekah a ṭum thumna atan hnathawhna tur sum ennawna tihpun (revised estimate) tum leh a ni.

NH 44A atan hian a tirah cheng vbc. 624.41 ruahman niin, hnathawh a nih aṭanga a kum lina kum 2015-ah hnathawhna tur sum ennawnin, cheng vbc. 713.5 a tihsan a ni a, kum 2018 ah hnathawhna tur sum hi ennawn leh niin, cheng vbc. 992.67 ah tihsan leh a ni. Tunah hian a ṭum thumna atan revised estimate siam leh niin, cheng vbc. 1,109.88 ah tihsan tum a ni.

Hetihlai hian a ṭum thumna atana revised estimate siam hi Ministry of Road Transport & Highway-in an pawm dawn em tih hriatchian a la ni loa, an pawm ngei erawh beisei a ni. NH 44A atana a ṭum thumna atana revised estimate cheng vbc. 1,109.88 hi a tira sum ruahman cheng vbc. 624.41 aiin cheng vbc. 485.47 in a tam zawk.

Revised estimate hi pawm a nih chuan NH 44A siam hna chu zawhfel vek theih tawh tura tih niin, hnathawh hun chhung tur chu October, 2022 thleng pawhsei a ni.

Vanglaini thudawn danin, tun dinhmunah, NH 44A hi Darlak leh Tuidam inkarah zawh theih mumal a la awm meuh lo a, Mamit - Dapchhuah inkarah a thui zawk chu kawng chhia a la ni rih.

Mamit aṭanga chhak lam zawng kawngko hnim a buk viau a, chetsual hlauhawm khawp a ni. Heng kawngko hnim hi hnathawktu company-te tihfai tur niin December, 2021 chhunga tifai vek tura hriattir an ni.