Serchhip damdawi-ina thihna sorkarin a chhui chiang dawn

Serchhip District Hospital-a raicheha thi leh naute pianghlim thih chungchangah Health minister Dr R Lalthangliana chuan Health & Family Welfare department chu chhuichiang turin a hriattir.

Sorkar thuchhuah tarlan danin, Serchhip District Hospital-a thihna thleng chungchangah hian Serchhip DC, District Magistrate ni bawk chu Magisterial Inquiry la turin sorkarin a ruat dawn a ni.

Vawiinah Health & Family Welfare Board vice chairman Dr ZR Thiamsanga, MLA; Health secretary R Lalramnghaka leh official dangte'n Serchhip damdawiin hi an tlawh ang.

Tarlan tawh angin, tun hnaia Serchhip District Hospital-a nausen piang hlim thihna leh raicheha nu thihna chungchang chhui chiang turin Serchhip Ṭhalai Pawl (SṬP) chuan December 6, 2021 khan Health minister Dr R Lalthangliana, bialtu MLA Lalduhoma leh Serchhip DC-te hnenah ngenna an thlen.

SṬP tarlan danin, October 29, 2021 tlai dar 3:30 khan Vanlaldinpuii w/o Robert K Vanlalchhuanga, Sialsir-in Serchhip District Hospital-a naute a hrin chu a tûk October 30 zan dar 8:30-ah a thi. Nausen thi hi damdawi-ina thawktute'n an ngaihsak ṭha tâwk lo nia an hriat thu, a chhungte'n an thehdarh bakah, nausen na tuar lai video social media-ah thehdarh a ni.

Sialsir nausén thih aṭanga ni 34-na, December 3, 2021 zan khan Serchhip District Hospital-ah vêk Malsawmkimi w/o Zaithankima, Tlangpui khua chu damdawi-inah nau chungah a thi a, a nau hrin pawh a thi. He thihna thlen chungchangah hian mitthi chhungte chuan thawktute inthlahdah vangah ngaiin, an rilru a nat thu an sawi a ni.

Hetih lai hian, nausen thih dan chungchangah Serchhip District Hospital-a thawktute intél khawm chuan press release siamin, insawifiahna an tichhuak a, tih dik loh an neih loh thu an tarlang.

SṬP chuan, sorkarin nausén thihna leh nau chunga thihna a thlen lohna tura sum tam tak sénga programme a kalpui mek laia inhnaih taka ṭum hnih ngawt Serchhip District Hospital-a thihna thleng leh mi pathum an thi chu pawi an tih thu an tarlang a, "Serchhip tan pawh a mualphothlak mai bakah, Serchhip leh a chhehvel mipui rilruah district hospital hi innghahna tlak loha ngaihna a lian ta hle," an ti.