Kolasibah Pawl Kut 2021 hmang

Art & Culture department leh Mizoram Cultural Organization (MCO), Sub Headquarter, Kolasib chuan nimin khan Kolasib IPR conference hall-ah Pawl Kut 2021 an hmang a, minister of state K Lalrinliana, bialtu MLA ni bawkin a hmanpui.

K Lalrinliana chuan hnam dinchhuahna leh tih hmasawnna kawngah hnam ziarang leh nun ze mawite chawi nun reng a pawimawh thu a sawi a, "Ram chhung leh pawna kan unau Zohnahtlakte nen pawha inunauna ṭha leh induhsakna lantirna hun atan Mizo in kût kan neihte hi hman a pawimawh," a ti a, Mizoram chu hmun hrang hranga Zofate tan inpui a nih angin a chhunga chengte pawhin rilru zau leh inhawng taka unaute dawngsawng ṭhin turin kalkhawmte a chah.

MCO president C Lalrinkima tarlan danin, Pawl Kût 2021 hmang tur hian Kolasib district-a cultural club 16 an inlan a ni.