KHAWTHLIR

CM tanpuina
Chief minister Zoramthanga chuan kumin Krismas pualin district 11-a home leh centre hrang hrangte tan Discretionary Grant, 2020 – 2021 aṭangin ṭanpuina sum Rs. 2,35,500 a pe chhuak. Ṭanpuina hi Aizawl district-ah Rs. 1,04,000, Lungleiah Rs. 38,000, Siaha-ah Rs. 11,000, Lawngtlaiah Rs. 9,500, Champhaiah Rs. 19,500, Serchhipah Rs. 12,500, Mamitah Rs. 9,000, Kolasibah Rs. 19,000, Saitualah Rs. 4,000, Hnahthialah Rs. 5,000 leh Khawzawlah Rs. 4,000 sem a ni dawn.

Thisen pe
Lawngtlai College NSS unit-te chuan nimin khan District Hospital blood bank tan thisen unit 13 an pe a, petute chu mipa 11 leh hmeichhia pahnih an ni.

ICDS zirho
Lawngtlai DC Dr Andrew H Vanlaldika kaihhruaiin December 7, Thawhlehni khan DC conference hall-ah Lawngtlai district-a naupang hriselna leh ṭhan lenna atana sorkar laipui ruahmanna Integrated Child Development Scheme (ICDS) kalpui dan thlirho a ni a; DPO, CDPO leh CO, BDO, DCPO, anganwadi worker-te, Mothers Committee, VC leh tlawmngai pawl aiawhte an tel. He hunah hian harsatna hrang hrang leh a chin fel dan tur leh hlawhtling zawka scheme kalpui dan turte an sawiho a ni.

Thinking Day
Mizoram Bharat Scouts & Guides chuan nimin khan State Chief Commissioner officer Lalsangliana pisaah state executive meeting an nei a, February 22, 2022-a Thinking Day hman tur chungchang an sawiho. Meeting-ah hian State Executive Committee-in Incentive Sub. Committee chairman atana a ruat K Lalhmangaihzuala'n report pein, state council-a kal zel turin pawm a ni.

Hall hawng
Kolasib bialtu MLA K Lalrinliana chuan nimin khan a MLA fund hmanga sak Kolasib Tuiṭhaveng community hall sak thar chu a hawng. K Lalrinliana chuan community hall chu a ṭangkai thei ang bera hman nise a duhthu a sawi.