Hri vei hmuhchhuah tlahniam

December 7, Thawh-lehni khan Mizoramah sample 3,252 endik niin Covid-19 vei mi 273 hmuh chhuah a ni a, Pathianni tiam loin tun December thlaa hri vei hmuh chhuah tlem ber ní a ni.

Thawhlehnia Covid-19 vei hmuh tharte chu mipa 123 leh hmeichhia 150 an ni a; ZMC RT-PCR a hmuh 21, TrueNAT hmanga hmuh 28, RAT hmanga hmuh 222 leh FIA hmanga hmuh pahnih an ni.

IDSP record angin, Mizoramah Covid-19 vei 1,37,057 hmuh chhuah a ni tawh a, mipa 66,142 leh hmeichhia 70,915 an ni a, mipa aiin hmeichhia 4,773-in an tam zawk. Nimin tlai dar 5 thleng khan mi 1,33,819 (97.63%) chhuahtir an ni tawh a, mi 508 (0.37%) thi tawhin, enkawl mek mi 2,730 (1.99%) an awm.

Nimin khan tlai dar 5 thlengin hripui vei dam tawh mi 309 chhuahtir an ni a, mitthi an awm lo; hripui vei enkawl mek mi 2,730 an awm a, hripui vei tawh aṭangin 1.99% a ni.

December 7, Thawhlehnia Covid-19 vei hmuh thar mi 273 zingah symptom nei mi 150 leh symptoms nei lo mi 101 an awm a, tarlan loh 22 a awm bawk.
Thawhlehnia swab sample endikah positivity rate 10% chung lam district pathum a awm a, positivity rate sànna ber Hnahthial district-ah 24.44% a ni. Positivity rate 10% chung lam dangte chu - Champhaiah 15.71% leh Saitualah 11.30% a ni a, Lawngtlai district-ah swab sample 219 endik niin hri vei hmuh an awm lo.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 7, 2021 thlenga swab sample endik tawh 14,53,760 aṭanga RT-PCR hmanga endik zat percentage chu 22.45 a ni a; RAT hmanga endik zat chu 71.64% a tling a, a pung zel thung.

Kum 2011 chhiarpui aṭanga chhûtin, Mizorama Covid-19 vei hmuh tawh 1,37,057 chu mi 1,000 zelah hripui vei mi 124 an awm ang a ni a; mi 1,00,000 zela Covid-19 vangin mi 46 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 309 an chhuak a; Aizawl district-ah 128, Siaha district-ah 56, Lunglei district-ah 29, Kolasib district-ah 23, Mamit district-ah 23, Champhai district-ah 17, Saitual district-ah 16, Hnahthial district-ah 11 leh Serchhip district-ah mi paruk an ni.