Tribal Art & Craft Festival hawng
Ministry of Tribal Affairs leh Social Welfare & Tribal Affairs department thawhhona hnuaiah Aizawl Art Gallery chuan nimin aṭang khan Aijal Club-ah 'Tribal Art & Craft Festival' an buatsaih ṭan a, Social Welfare & Tribal Affairs (SWTA) minister Dr K Bechhua in a hawng. Festival hi Azadi ka Amrit Mahotsav puala buatsaih niin December 11, Inrinni thleng neih tur a ni.
Dr K Bechhua chuan festival chu Azadi ka Amrit Mahotsav hnuaia SWTA department in programme 11 a buatsaih tur zinga pakhat leh a bul ṭanna a nih thu a sawi a,"Mizoram sorkarin Ministry of Tribal Affairs hnuaiah kan tribal nun ziarang pholanna, humhalhna leh tih hmasawnna turin chak takin hma a la chho mek a, tunah hian project lian tham tak tak kalpui mek a ni," a ti a, festival chu hluta tlawh ṭheuh turin mipui a sawm.
Mizoram hmun hrang hrangah hmasawnna ruhrel lian tak tak thawh chhoh mek a nih thu sawiin Minister chuan,"Tunah hian Kelsih hmunah SWTA department in Ministry of Tribal Affairs hnuaia project liantham tak tak pahnih a nawrchhuah pawh tluang takin thawh mek a ni a, nakkumah heng hmasawnna ruhrelte hi hawn theih a ni ang," a ti.
Festival-ah hian lemziakthiamte, puantahtute, kuthemthiam leh kermawi lam thiamte kutchhuak phochhuah a ni a, December 11 thleng ni tin zing dar 10 leh tlai dar 4 inkarah tlawh theih a ni ang.
Tribal Art & Craft Festival hawnna inkhawm hi SWTA director A Vanlalzawni'n a kaihruai a, Aizawl Art Gallery chairman Lalṭanpuia leh SWTA deputy director C Zodinpuiite pawhin thu an sawi.