SEDP aṭanga zirtirtu ruai turin MSU-in Chief Minister an ngen

Mizo Students’ Union (MSU) hruaitute chuan nimin khan chief minister Zoramthanga a pisa-ah an kawm a, Mizoram sorkar sikula zirtirtu indaih lohna chungchang leh kum 2021–22 atana Mizoram State Health Care Society (MSHCS)-a budget dah a nih loh chungchang an sawipui.

MSU chuan ram puma sorkar sikul primary aṭanga high school-ah zirtirtu indaih lohna a nasat avangin zirtirna kalpui hleih theih a ni lo tih sawiin, Chief Minister hnenah SEDP aṭanga zirtirtu ruai turin an ngen.

Chief Minister chuan MSU ngenna leh thlen anga SEDP aṭanga zirtirtu rawih chu ṭul a tih thu sawiin, SEDP aṭanga zirtirtu ruai turin ruahmanna siam a nih tur thu MSU hruaitute a hrilh.

Mizoram sokarin mi harsa zawkte tana damdawi ina an inenkawlna senso an hmuh let theih nana MSHCS a kalpui mekah kum 2021–22 atana budget-ah sum dah a ni lo chu MSU chuan hriat thiam har an tih thu thlenin, kumin April aṭanga mipuite bill batsak te a rang thei ang bera pek a nih theihna atana hmala turin CM an ngen.

Chief Minister chuan MSHCS-a mipuite sum batsak chu kumin Krismas hma ngeia eng emaw zat pek chhuah a nih tur thu a sawi.