MNF sorkarah mipui an thlamuang - MNF Adviser

Vaphai Group MNF chuan nimin khan Vaphai community hall-ah mithar lawmluh inkhawm an buatsaih a, an hun hmanpuitu MNF adviser Lalruatkima chuan MNF sorkarah mipui thla a muan thu a sawi.

Lalruatkima chuan Congress sorkar hnuaiah Zoramin harsatna nasa tak a tawk nia sawiin, “Zu zawrh avangin kan society a chhe nasa em em a, Mizo mipuiten zu zawrh titawp thei sorkar kan thlangtling ta a ni. Kawng hrang hranga Zoramin harsatna a tawh chu Pu Zoramthanga kaihhruai sorkar chak tak hmangin sutkian a ni ta mek a, a lawmawm hle a ni,” a ti.

Ram leh hnam chhan turin Zoramthanga kaihhruai sorkar chuan eng pawh a huam thu sawiin MNF Adviser chuan, “Chu chu ramri kan humhalha kan chet danah pawh Mizo mipuite hi a hmuchiangtu an ni,” a ti a, ram neitu dik tak ni lo sorkar lai chuan kan police-te pawh an huai thei lo a, tunah erawh chuan an huaisen tawh thu a sawi.

Lalruatkima chuan Congress party chu inthlan awm apiangah nasa takin an tla zar zar tih sawiin, “Balu chunga ui bawk ang mai, an tal nat apiangin an hniam telh telh mai a ni. Han tho leh mai chi an ni lo. ZPM lah nise an chhungkua an buai nasa em em a, an party office-ah pawh pawl hrang hrang aṭanga lutte an ṭhu hrang far zel. Kalphung thar an tihahte hian kalphung thar hmuh tur a awm lo,” a ti.

MNF thuchhuah tarlan danin, Lalruatkima hian an party-ah mithar 125 a lawmlut a, lawmluh zingah hian Congress VC member pahnih an tel avangin Vaphaiah hian MNF VC a ding dawna ni.