Hunpuia boruak muanawm dan tur sawiho Dan leh thupek khauh zawka kalpui an rel

Aizawl DC Dr Lalhriatzuali Ralte hoin nimin khan DC conference hall-ah sorkar hotute'n Krismas leh kumthar vuakveta boruak muanawm a awm theih dan tur an sawiho a, Covid 19 appropriate behaviour (CAB) bakah dan leh thupek khauh zawka kalpui nise an ti.

Ṭhukhawm chuan, Krismas leh kumthar vuakvetah sorkarin SOP a siamte ṭha taka zawm anih theih nan AMC area hmun engemawzatah executive duty dah nise; AMC pawn lamah chuan VLTF-te'n hma la se, an ti. Kohhran tinah kohhran hruaitute leh task force-te in berawnin SOP implementation committee din ngei tura ngen ni se, an ti bawk.

Khawpui chhunga duhna hmun hmuna kawng kân ṭhin an awm thu leh traffic jam a belhchhah thu tarlan a ni a; traffic hotute nen mipui kawng kânna hmun bik (pedestrian crossing) tur enhoa ruahmanna siam nise an ti.

Police hotute'n halpuah leh halmawi zawrh leh hman chungchanga an hmalakna an tarlang a - courrier service hrang hrang leh online shopping site hrang hrang hnenah ngenna an ziah tawh thu leh endikna pawh an neih chhoh mek thu an sawi.

District administration-te chuan ramri hrul district thuneitute hnenah halpuah leh halmawi lakluh chungchangah nasa zawka endikna kalpui tura ngen an tum thu an tarlang.

MIMA hotute chuan mipuite khawpuia bazar tura punkhawm ngai lo a, mahni khua ṭheuha an mahmawhte lei theih tura ruahhmanna siam an tum thu an sawi.

Ṭhukhawm chuan Commerce & Industries hotute chu bazar-na hmunte a darhsarh thei ang bera ruahmanna siam tur leh bazar-na hmunahte CAB ṭha taka zawm anih theih nan mipuiah tlangau turin an ruat bawk.

He hunah hian Aizawl SP, Traffic SP, Excise & Narcotics, AMC, Commerce & Industries leh MIMA aiawhte an tel a ni.