Refugee camp-a roll revision neih leh Vote thlak rem kan ti lo - HM Zira

Home minister R Lalzirliana chuan, Tripura-a Bru relief camp-ah Mizoram electoral roll atana roll revision neih leh camp-a vote thlak Mizoram sorkarin rem a tih loh thu a sawi.

Thuthar thehdarhtute'n a pisaa an kawmnaah Home Minister chuan, Election Commission of India (ECI) chuan Tripura relief camp-a electoral roll revision nei turin Mizoram sorkar a hriattir thu a sawi a, "Mizorama Election department chuan roll revision neih mai pawi an ti lo a, mahse, Mizoram sorkar chuan kan duh lo. ECI intiam tawh angin, refugee camp-a roll revision neih hi ṭul kan ti lo," a ti.

R Lalzirliana chuan, Bru refugee camp aṭanga Mizoram khua leh tui dik tak lo kir an awm chuan roll revision tihsak leh mai tur an nih thu sawiin, "Roll revision neih hi thil harsa a ni lo a, inthlan puan hnuah pawh ni se a tih theih," a ti a; Mizoram chhungah chauh roll revision kalpui chu Mizoram sorkar duh dan a nih thu a sawi.

Ṭum dang anga refugee camp-a vote thlak Mizoram sorkarin a remtih dawn loh thu sawiin Home Minister chuan, "Rawn kîr duhte chuan Mizoramah ngei vote an thlak tur tih hi kan ṭan tlatna a ni. Hei hi ECI lam pawhin min pawmpui tawh niin kan hria a, official chuan kan la dawng lo," a ti.

Ministry of Home Affairs (MHA), Mizoram sorkar, Tripura sorkar leh Mizoram Bru Displace People Forum (MBDPF)-in inremna an siam Bru mipuite'n an dodal chungchangah Home Minister chuan, Mizoram sorkarin a hranpaa hriattirna a la dawn loh thu a sawi a, "Ram pe tura an phût hi a tam tham deuh avangin Mizoram sorkarin pek tur a nei lo," a ti a; Bru-te duh dan ang ngawtin Mizoram sorkar a kal theih bik loh thu a sawi.

R Lalzirliana chuan, sorkar laipuiin a tum tur chin Bru-te'n an phût hlawhtling thei a nih chuan Mizoram sorkarin a dodal lo tih sawiin, "Refugee camp-a Bru Mizorama rawn kîr turte sorkar laipuiin a pek tur ang chu, tun hmaa lo kîr tawhte pawhin dawng ve ngei se tih hi Mizoram sorkar duh dan a ni," a ti.