ZPM-in zirlai 850 exam thei lo pawi an ti ; Sorkar hnathawk kut phuar phelh an tum

Zoram Peoples' Movemnet (ZPM) office bearer-te chu nimin khan an pisaah ZPM Steering Committee chairman Lalliansawta kaihhruaiin an ṭhukhawm a; resolution pass in, government lumpsum grant-in-aid higher secondary school zirlai 850 vel exam thei loa an awm mek chu pawi an tih thu an tarlang. Lalliansawta chuan, ZPM an sorkar chuan sorkar hnathawhte kut phuar phelh a nih tur thu a sawi.

ZPM Steering Co­mmittee Chairman chuan, "Sorkar hnathawkte hi an thiamna leh theihna hmang thei loin phuarbeh an ni a, ram siam tur leh hmasawnna thlen theih nan sorkar hnathawk kut phuar phelh a ngai a ni," a ti.

Lalliansawta chuan, state sorkarin Central scheme leh project-te uluk leh a nihna ang takin hmangin kalpui

ṭhin se chuan, Mizoramah hma­sawnna a thlen a rin thu a sawi a, "PMGSY, National Bamboo Mi­ssion-te hi guidelines leh specification nei vek an ni a, state sorkar thuneitute hian Project Implimenting Unit (PIU) lamah kut phuar an neih ṭhin avangin a nih tur ang a ni phak ṭhin lo," a ti a; engineer, agriculturist thiam leh ram hmangaih tak takte'n an thiamna an hmang ṭha thei ṭhin lo tih a sawi.

ZPM office bearer meeting hian resolution pass-in, 'Mizoram Go­vernment Lumpsum Grant-in-Aid Higher Secondary School-te'n dinhmun sanga hlangkai tura an ngenna sorkarin sum harsat chhuan lama an tihhlawhtlin sak loh avanga sikul pakua ni 21 chhung lai an khar leh zirlai 850 laiin first term an exam thei lo hi ZPM chuan pawi a ti hle. Sum awm loh chhuanlama zirlai heti zozaiin an zirna an khailak hial laia kan sorkar hrawn mek in NLUP sum MLA bial tina cheng nuai 400 (cheng nuai 16,000) ngawt vote zawn nan a sem thei bawk si hi ZPM chuan dik a ti lo a, pawi a ti takzet a ni," an ti.

ZPM resolution dangte
1) Union minister DV Sadananda Gowda chuan Mizoram sorkar chu hmasawnna hna thawh kawngah chak lo hleah a rawn puang hi hnam angin a mualphothlak a, sorkar kal mek hi hmasawnna hna thawh ngaihna hre loah ZPM chuan a ngai a, thuneihna kawltir chhunzawm tlak an ni tawh lo tih hre turin mipuite a ngen a ni.
2) ZPM OB meeting chuan zoram puma ṭangrual pawl hmasawn dan a thlirho a lungawithlak a ti tak zet. Tun hnaiah kut hnathawkte'n ZPM thlai thar policy leh hmasawnna policy-te an tuipui hi lawmawm a ti a, ṭhalai lehkhathiamte'n ZPM-ah beiseina sang tak an nei thar zel tih a hmuhin lawmawm a ti tak zet a ni.