Vawiinah Lunglei kawng dan tum
Lunglei Civil Hospital aṭanga doctor sawn chhuahte aiawhtu tur dah kim a la nih loh avangin MZP headquarters, Lunglei chuan vawiin, Ningani zing dar 6 aṭangin Lunglei pawhna kawngpuite dan an tum.
Lunglei MZP thuchhuah tarlan danin, Lunglei aṭanga doctor sawn chhuahte aiawh dah a nih theih nan July 16-17, 2018 chhung khan Lunglei Civil Hospital Medical Superintendant pisa kai tur an dang a, sorkar aṭang thu lawmawm an hriat loh avangin July 17 tlai khan emergency meeting an nei a ni. Hetih lai hian, Mizoram sorkar chuan July 13, 2018-ah Dr T Lalrintluanga, medicine specialist chu Aizawl aṭangin Lunglei Civil Hospital-a awm tura tihna order a chhuah. Hemi chungchangah hian Lunglei MZP chuan lawmthu an sawi.
Doctor pakhat dah tawh mah se, doctor dang transfer-te aiawhtu tur dah a la nih loh avangin Lunglei MZP chuan July 19, Ningani zing dar 6 aṭangin Lunglei pawhna kawngpuite an dang dawn tih an tarlang a ni.