Lottery kalpui dan turah thtlukna Siam a la ni lo - Finance Minister
Mizoram sorkar chuan Mizoram State Lottery kalpui mek July 10, 2018-a a tihtawp hnuah, lottery kalpui zui zel a nih dawn leh dawn loah thutlukna a la siam lo.
Vanglaini palai zawhna chhangin Finance minister Lalsawta chuan, lottery kalpui dan tur ngaihtuahtu Finance secretary Lalnunmawia Chuaungo kaihhruaina hnuaiah State Lottery Committee a awm thu a sawi a, "Anni hian engtin nge lottery kalpui zui zel dan tur an ngaihtuah dawn a, state hrang hrangin lottery an kalpui dante pawh lak khawm a ni," a ti.
Lalsawta chuan, State Lottery Committee chu an ṭhukhawm tawha a hriat thu sawiin, "An report ka la hmu chiah lo a, ka hmuh hunah ka zir chiang ang a, chumi hnuah Chief Minister-ah ka thehlut leh ang," a ti a; Chief Minister-in report a enfiah hnuah lottery kalpui zel dan turah thutlukna siam a nih tur thu a sawi.
Sorkarna an chan hnuah Mizoram State Lottery atan dan an siamṭhat hret hret thu sawiin Finance Minister chuan, "Sum lut pawh a tam telh telh a ni. Pawisa tam zawk kan hmuh theihna atan distributor lam pawh kan nawr nasa ṭhin viau," a ti.
Finance Minister chuan, lottery kalpuina atana rules awm sate paih veka a thar siamṭhat leh chu sorkar duh dan a nih thu sawiin, "Sorkar laipuiin lottery atana dan a siam hnuaiah state-in kan duh dan angin rules kan siam ve leh thei a ni," a ti a; lottery chu state sorkarin sum a hmuhna ṭangkai tak a nih thu a sawi.
Lottery aṭangin state sorkarin MNF sorkar lai aiin sum a hmuh ṭhat zawk daih thu sawiin Lalsawta chuan, "Kum 2006-07 khan lottery ticket vaibelchhe 1,00,000 chuang hralh a nih laiin, sorkar sum hmuh chu cheng nuai 200 chauh a ni. CAG-in Congress sorkar hnua lottery a kalpui dan a chhui kum thum chhung khan ticket nuai 1.1 hralh a ni a, sorkar sum hmuh chu cheng vbc. 25 a ni," a ti.
Tarlan tawh angin, Mizoram sorkar chuan Mizoram State Lottery kalpui mek chu July 10-ah a titawp a, lottery tihtawpna thupek chu Finance department-in an chhuah a ni.
MNF party chuan, Mizoram State Lottery kalpui danah thil dik lo a awm nia hriain, July 9, 2018 aṭangin Institutional Finance & State Lottery Directorate-a thawktute pisa kai tur an dang ṭan a, July 10 khan dan chhunzawm lehin, lottery tihtawp hrih a nih tak avangin pisa kai tur dan hi an chawlhsan a ni.