KHAWTHLIR

In saksak
Kualmawi Branch YMA chuan an huam chhunga hmeithai pakhat in an saksak. In sakna atan hian Bilkhawthlir South VEC-in Rs. 30,000, Vanhnuailiana Section, Kualmawi-in Rs. 5,000, bialtu MLA K Lalrinthanga'n Rs. 5,000, Lalrinsanga, Aizawl-in Rs. 5,000 an thawh a, khawtlangin hnatlangin a sak hna an thawk a ni.

Thisen pe
Hrangbana College NSS chuan nimin khan an college Golden Hall-ah blood donation camp an huaihawt a, zirlai mipa 208 leh hmeichhia 62-te'n Aizawl Civil Hospital tan thisen unit 270 an pe.

Zirlai thar lawm
Johnson College Students’ Union buatsaihin nimin khan Vanapa Hall-ah Fresher Social cum Graduation Day hman a ni a, Higher & Technical Education minister R Romawia'n a hmanpui. R Romawia chuan, ram leh hnamin a mamawh azira college-te her rem zel a pawimawh thu a sawi. Johnson College-ah hian academic session 2018-19 atan zirlai thar 473 leh graduate thar 112 an awm.

Din champha lawm
Khawlailung Dinthar Branch YMA chuan nimin khan an veng middle school-ah an din champha vawi khatna an lawm a, minister Vanlalawmpuii Chawngthu-in a hmanpui. Vanlalawmpuii chuan, YMA chu Mizoram rohlu a nih thu a sawi. Khawlailung Din­thar Branch YMA-ah hian member 260 an awm.

Delhi-ah Sawta
July 21, 2018 khian New Delhi-ah Goods & Service Tax Councul Meeting vawi 28-na neih a ni dawn a, meeting-a tel turin Finance minister Lalsawta chuan vawiin hian Mizoram a chhuahsan ang.

Tlawngah tla hlum
Samuel Lathlengliana (24) s/o Lalengvara (L), Sairang Dawrveng chu July 17, Thawhlehni tlai khan Tlawng lui, Sairang Balukaiah a tla hluma hriat a ni a, khawtlangin an zawng nghal. Sairang YMA president Sang­rotluanga hnen aṭanga thu dawn danin, Samuel Lalthlengliana hi nimin tlai dar 5 thleng khan an la hmu lo a, nizan lamah hmuh a nih loh chuan vawiinah pawh zawn ­chhunzawm a ni ang.