Larsap hoin MADC hotute ṭhukhawm

Mara Autonomous District Council (MADC) meeting chu nimin khan Governor Kummanam Rajasekharan hoin Raj Bhavan-ah neih a ni a, thil pawimawh hrang hrang an sawiho.

Governor chuan autonomous district council tana ngaihtuahna sen leh thawhho chu meeting-in a tum a nih thu sawiin, "Council dinhmun uluk taka zirchian a, thutlukna leh ruahmanna mumal tak siam a, uahmannate chu a hun taka zawh ṭhin tur a ni," a ti a, hmasawnna hnathawk tura sum an hmuhte chu renchem taka hmanga, ruahmanna siam lawk anga hmang turin MADC hotute a chah.

MADC hotute chu report te chu a hun taka thehlutin, an hmalaknate dinhmun chu thuneitu sang zawk hriattir a, tanpuina an mamawh pawha dil ṭhin tura hrilhin Larsap chuan, "Central leh state sorkar chunga innghah reng a rem dawn loa, sum lakluhna kan dap thiam a mipuite dinhmun kan chawikana, an intodelh a pawimawh a ni," a ti.

Governor chuan MADC hotute chu harsatna siamtu nge, sukiangtu an nih in enfiah ṭhin tura chahin, "Hun inher dang­lam mil zela kan khawthlir kan tihdanglama, council tana rua­hmanna ṭha leh a hlenchhuah dan turte kan siam a ngai a ni," a ti a, MADC hotute chuan thawhhona ṭha tak an neih a, hmalam an pan zel a beisei thu a sawi.

Meeting-ah hian Autonomous District Council-te Fund Rules chu siam danglam tura hmalak mek a nih thu te, Accountant General rawtna anga internal audit pawh hman ­thuai a nih tur thu te, tui pump chungchang, agriculture leh a kaihnawih, bawlhhlawh paihna leh sawngbawlnaa an harsatna a awm thute leh helicopter service ṭha zawk mamawh a nih thute tarlan a ni.

Meeting-ah hian MADC hotute chuan memorandum pahnih, 'The Amendment to the 6thSchedule of the Indian Constitution and the Revocation of Ban on Recruitment to the District Council' tih leh ‘A Report of Administrative Reforms Commission Mara Autonomous District Council 2018’ tih chu Governor hnenah an thehlut a ni.