HIMNA-MADAT kalpui dan tur sawiho

Sikul naupangte vaihlo zûk leh hmuam leh ruih theih thil laka an him theihna tura sorkar hmalakna, HIMNA-MADAT (Mizoram Against Drugs, Alcohol & Tobacco) project-te Aizawl district bika kalpui dan tur ngaihtuahin nimin khan a kaihhawih hotute Aizawl DC conference hall-ah an ṭhu a, Aizawl bawrhsap Dr A Muthamma-i'n a kaihruai.

Project HIMNA-MADAT hi New Economic Development Policy (NEDP) hnuaia Aizawl DC Pilot Project a ni a, zûk leh hmuam leh ruih theih thil laka naupangte an fihlim theihna tura beihpui thlakna a ni. Project kalpuina turah a kaihhnawih sorkar agency, kohhran leh tlawmngai pawl hruaitute nen sawiho tawh a ni a; May 2018 khan kohhran hruaitute pualin training buatsaih a ni tawh bawk.

Nimina meeting-ah hian HIMNA-MADAT chak zawka kalpui dan tur ruahmanna leh sum ruahmante an thlir a, ruahmanna siam sate chu an pawm. Aizawl DC chuan, Mizoram puma HIMNA-MADAT kalpuina atan sorkar­in cheng nuai 200 a dah thu leh, Aizawl district chu district lian ber a nih avangin nuai 50-60 vel an neih thu a sawi.

HIMNA-MADAT atana ruahmanna zingah - project-in a huam sorkar middle school zawng zawngah Himna Club din te, mipui zirtirna tur poster leh sticker târ te, awareness atan sikul hrang hrangah drawing, essay leh elocution competition buatsaih te, zirtirtute leh zirlai nu leh pate nena inhmuhkhawmte a tel. He project hi kakpui ṭan tawh a ni.

HIMNA-MADAT hian middle school zirlaite a thlúr bing a, Aizawl district bikah chuan sorkar, deficit leh adhoc aided M/S 227 a huam a; M/S 227-ah chuan zirlai 11,503 an awm.

HIMNA-MADAT ah hian module pahnih siam a ni a; Level-1 chu pawl 5 leh 6 tana ruahman niin, chutah chuan chhungkaw pawimawhna te, ṭhian neih ṭhat te, hriselna leh ruihhlo chungchangte a tel. Level-2 chu pawl 7 leh 8 zirlaite tana duan a ni a; zirlaite tana ruihhlo, zu leh vaihlo laka inven dan te, taksaa a thawh dan te, zirlaiten thuthlukna dik tak an siam theih dante tarlan a ni.

HIMNA-MADAT kalpui tur hian M/S tin aṭangin nodal teachert pakhat zel ruat an ni tawh a, chu'ng mite chu training la pek leh tur a ni. Aizawl district-a M/S 227-te chu HIMNA-MADAT member leh Health department mi leh sate'n an tlawh chhuak dawn a, chu chu August 2018-ah ṭan tum a ni. Zirlai naupang thlan chhuah 50-te damdawi-in leh tobacco cessation clinic-te tlawhpui tum a ni bawk.

Meeting-ah hian Health department, School Education department, SSA, SCERT, Institute of Advanced Study in Education (IASE), MSACS, Mizoram University-a Mass Communication department aiawhte leh kohhran pawl hrang hrang aiawhte an tel a ni.